އެމެރިކާއިން ވެނެޒުއޭލާގެ ވެރިކަމުގެ ކޮންޓްރޯލް އަތުލައި، އެ ގައުމުގެ ރައީސް ނިކޮލަސް މަދޫރޯ ހައްޔަރުކޮށޤގެން ޝަރީއަތަށް ނިއުޔޯކަށް ގެންދިއުމާ ގުޅިގެން، ވެނެޒުއޭލާގައި ހުރި ޗައިނާގެ ސެޓެލައިޓް ޓްރެކިންގް ސްޓޭޝަންތަކާއި އެ ނޫންވެސް ނާޒުކު ޓެކްނޮލޮޖީ ވަސީލަތްތައް ޗައިނާއަށް ގެއްލުމުގެ ބިރު ބޮޑުވެއްޖެއެވެ.

ވެނެޒުއޭލާގައި ހުރި ޗައިނާގެ މުހިންމު ވަސީލަތްތަކުގެ ތެރޭގައި ސެޓެލައިޓް ގްރައުންޑް ސްޓޭޝަންތަކާއި، ތެޔޮ ވަޅުތަކުގެ ނިޒާމުތަކުގެ އިތުރުން ޓެލެކޮމިއުނިކޭޝަން ނެޓްވޯކްތައް ހިމެނެއެވެ. އެމެރިކާގެ ރައީސް ޑޮނަލްޑް ޓްރަމްޕް، ވެނެޒުއޭލާ "ހިންގާނީ" އެމެރިކާއިން ކަމަށާއި، ދުނިޔޭގެ އެންމެ ބޮޑު ތެޔޮ ރިޒާވް އޮތް އެ ގައުމުގެ ތެޔޮ އިންފްރާސްޓްރަކްޗާ މަރާމާތުކުރާނެ ކަމަށް ވިދާޅުވުމާ ގުޅިގެން، މި ވަސީލަތްތަކުގެ ރައްކާތެރިކަން ވަނީ ގެއްލިފައެވެ.

ވެނެޒުއޭލާގެ ކެޕްޓަން މެނުއަލް ރިއޯސް އެއަރބޭސްގައި ހުންނަ "އެލް ސޮމްބްރޭރޯ" ޓްރެކިންގް ސްޓޭޝަނާއި، ބޮލިވާރް ސްޓޭޓްގެ ލުއޭޕާ ގައި ހުންނަ ބެކަޕް ސްޓޭޝަނަކީ، ވެނެޒުއޭލާގެ ހަމައެކަނި ރިމޯޓް ސެންސިންގް ސެޓެލައިޓަށް އެހީތެރިކަންދޭ ތަންތަނެވެ. މިއީ ޗައިނާއިން ބޭނުންކުރާ، އެ ގައުމުން ބޭރުގައި ހުރި މަދު ގްރައުންޑް ފެސިލިޓީތަކުގެ ތެރޭގައި ހިމެނޭ ތަންތަނެވެ.