މިދިޔަ ޑިސެމްބަރުމަހުގެ ފަހުކޮޅުން ފެށިގެން އީރާނުގައި ކުރަމުން އަންނަ މުޒާހަރާގެ އޮއިވަރު މިހާރު ވަނީ މުޅިން އެހެން ގޮތަކަށް ބަދަލުވާން ފަށާފައެވެ. އީރާނުގެ މަގުތަކަށް މުޒާހަރާގެ ބައިވެރިން ނިކުތީ، އެޤައުމުގެ އިގްތިސާދީ ހާލަތު އޮތްގޮތުން ދިރިއުޅުމުގެ ހަރަދުތައް ބޮޑުވެ، ތަކެތީގެ އަގުތައްވެސް އިންތިހާއަށް މައްޗަށްދާން ފެށުމުންނެވެ. 

މުޒާހަރާއަށް ދެހަފްތާއަށްވުރެ ގިނަދުަވސް ވެފައިވާއިރު، މުޒާހަރާގެ އޮއިވަރު މިހާރު ވަނީ މުޅިން ބަދަލުވެފައެވެ. މުޒާހަރާއާ ގުޅޭގޮތުން މިހާރު އެންމެބޮޑަށް އިވެމުންދާ ހަބަރުތަކަކީ، މުޒާހަރާގެ ބައިވެރިންނާއި، ސަލާމަތީ ބާރުތަކުގެ ކުރިމަތިލުންތަކުގައި މަރުވަމުންދާ މީހުންގެ އަދަދު އިތުރުވަމުން އަންނަ ވާހަކަތަކެވެ. މީގެ އިތުރުން ތަންތަނުގައި ރޯކުރުމާއި ގެއްލުންދިނުންވެސް ވަނީ ކަންބޮޑުވާ ދަރަޖައަކަށް އިތުރުވެފައެވެ. 

މުޒާހަރާތައް ހޫނުވަމުންދާ މައްސަލާގައި އެންމެފަހުން އީރާނުގެ ރޫހީ ލީޑަރު އާޔަތުﷲ އަލީ ހާމަނާއީ ވަނީ ނިކަން ވަރުގަދަ އިންޒާރެއްވެސް ދެއްވާފައެވެ. އީރާނުގެ ސަރުކާރުން ޤަބޫލުކުރާގޮތުގައި މިހާރު މުޒާހަރާ ކުރަމުންދަނީ އެޤައުމަށް ނިސްބަތްވާ ރައްޔިތުންނެއް ނޫނެވެ. އެއީ އެމެރިކާ އާއި އިޒްރާއީލަށް ނިސްބަތްވާ ތެރަރިސްޓުންކަމަށް ހާމަނާއީ ވަނީ އެންމެފަހުން ދެއްވި ތަގުރީރުގައި ވިދާޅުވެފައެވެ. 

އީރާނުގައި ކުރަމުންދާ މުޒާހަރާގެ ތެރެއިން.. ފޮޓޯ: އޭޕީ

ހާމަނާއީގެ އެވާހަކަތައް އެގޮތަށް އައުމުގެ އެންމެބޮޑު އެއް ސަބަބަކީ، މުޒާހަރާގެ ބައިވެރިން ސަލާމަތީ ބާރުތަކަށް ދެމުން އަންނަ ވަރުގަދަ ހަމަލާތަކެވެ. ފަހަކަށް އައިސް މުޒާހަރާގެ ބައިވެރިންނާ ކުރިމަތިލާ ސަލާމަތީ ބާރުތަކުގެ އޮފިސަރުން މަރުވާ އަދަދު ވަނީ އިތުރުވެފައެވެ. އީރާނުން ވަނީ އެމެރިކާ އަދި އިސްރާއީލުން ޓްރެއިން ވެގެންތިބި ބަޔަކު މުޒާހަރާގެ ތެރޭގައި ހަރަކާތްތެރިވަމުންދާކަމަށް ތުހުމަތުކޮށްފައެވެ.

މެދުއިރުމަތީގެ ރިޕޯޓްތައް ބުނާގޮތުގައި ހުޅަނގުގެ ބައެއް ޤައުމުތަކުންނާއި އިސްރާއީލުން މިހާރު މަސައްކަތްކުރަމުންދަނީ އީރާނުގެ މިހާރުގެ ސަރުކާރު ވައްޓާލުމަށެވެ. މިކަން މިއަދު އިސްރާއީލްގެ ބޮޑުވަޒީރު ބެންޔަމިން ނަތަންޔާހޫގެ ކެބިނެޓް ބައްދަލުވުމަށްފަހު ދިން ސްޓޭޓްމަންޓުން ވަރަށް ރަނގަޅަށް ވަނީ ސާފްވެގެން ގޮސްފައެވެ. ނަތަންޔާހޫ ދިން ސްޓޭޓްމަންޓްގައި ބުނެފައިވަނީ އީރާނުގެ ވެރިކަން ބަދަލުކުރުމަށް މަގުތަކަށް ނިކުމެ މުޒާހަރާ ކުރަމުންދާ ފަރާތްތަކަށް ދެވެން އޮތް ހުރިހާ އެއްބާރުލުމެއް ދެމުންގެންދާނޭކަމަށެވެ. އެގޮތުން ވެރިކަން ބަދަލުވަންދެން އިސްރާއީލް އަދި އެމެރިކާ އޮންނާނީ އެމީހުންނާއެކު ކަމަށް ނަތަންޔާހޫ ވަނީ ބުނެފައެވެ.

އެމެރިކާ އަދި އިސްރާއީލްގެ އިތުރުން ކެނެޑާއިންވެސް ވަނީ މުޒާހަރާގެ ބައިވެރިންނާއެކު އޮތްކަމަށް ބުނެފައެވެ.

އެމެރިކާއިން އީރާނަށް ދަތިކުރުމުގެ ފިޔަވަޅުތައް އަޅާފައި އޮންނަތާ އެތައް އަހަރެއް ވީނަމަވެސް އީރާން ފާހަގަކުރެވެނީ އެމެރިކާ އަދި އިސްރާއީލުން އެންމެ ޖެހިލުންވާ ޤައުމަށެވެ. ސަބަބަކީ އެމެރިކާ އާއި އެޤައުމުގެ ބައިވެރިން ދަތިކުރުމުގެ ފިޔަވަޅުތައް އަޅާފައި އޮތްނަމަވެސް ނިއުކްލިއާ އަދި ޓެކްނޮލޮޖީގެ ރޮނގުން ހޯދަމުންދާ ކާމިޔާބީތަކެވެ. ކޮންމެއަކަސް އީރާނުން މިހާރުވެސް ގޮސްފައިވާ ހިސާބަކީ އިސްރާއީލާ އެމެރިކާއަށް ހަޖަމްކުރެވޭ ވަރުގެ ކަމެއް ނޫންކަމަށް މަސްރަހް ދިރާސާކުރާ ފަރާތްތަކުން އިއްތިފާގު ވެއެވެ.

އީރާނުގެ ހަކަތަ ފައްކާކުރުމުގެ ޕްރޮގްރާމުގައި ހިމެނޭ ތަނެއް... ފޮޓޯ: އޭޕީ

އީރާނުން ބުނެފައިވަނީ އެޤައުމުން ނިއުކްލިއާ ތަރައްޤީކުރަނީ ޤައުމުގެ ދިފާއުގެ އިތުރުން ސިއްހީ އަދި އެނޫންވެސް ވަސީލަތްތައް ކުރިއެރުވުމަށް ކަމަށެވެ. އެގޮތުން ނިއުކްލިއާ ތަރައްޤީކުރަނީ ބަޔަކަށް ހަމަލާދީ އެހެން ޤައުމުތަކުގެ އިސްތިގްލާލު ނަގާލުމުގެ ނިޔަތެއްގައި ނޫންކަމަށް އީރާނުން ވަނީ ބުނެފައެވެ.

އެމެރިކާއިން ދަތިކުރުމުގެ ފިޔަވަޅުތައް އަޅާފައި އޮތްނަމަވެސް އީރާން ފާހަގަކުރެވެނީ އަމިއްލަ މަސައްކަތުން ކުރިއެރުން ހޯދަމުންއަންނަ ޤައުމެއްގެ ގޮތުގައެވެ. އެގޮތުން އީރާން ހިމެނެނީ ރޮކެޓްގައި ސެޓްލައިޓް ޖައްވަށް ފޮނުވުމުގެ ގާބިލްކަން ލިބިފައިވާ އިސްލާމީ ހަމައެކަނި ޤައުމުގެ ގޮތުގައެވެ. 

އީރާނުން ނިއުކްލިއާ ހަތިޔާރު އުފައްދައި ބާރުވެރިކަން ހޯދަމުންދާކަމަށްބުނެ އެމެރިކާއިން މިދިޔަ އަހަރު ވަނީ އެޤައުމުގެ އަސްކަރީ ބައެއް ތަންތަނަށް ހަމަލާދީފައެވެ. އެމެރިކާއިން ބުނެފައިވަނީ ހަމަލާތައް ދިނީ ނިއުކްލިއާ މަރުކަޒުތަކަށް ކަމަށެވެ. މި މައްސަލާގައި އީރާނުން ވަނީ ނިއުކްލިއާ މައްސަލާގައި އެމެރިކާ އާއެކު ސުލްހައިގެ ވާހަކަތައް ދެން ކުރިއަށް ނުގެންދާނޭކަމަށްވެސް ބުނެފައެވެ. އީރާނުގެ ނިއުކްލިއާ މައްސަލާގައި އެމެރިކާއިން އޮތީ އެޤައުމަށް ހަމަލާދޭން ތައްޔާރަށެވެ. ނަމަވެސް މިވަގުތު އެމެރިކާ އަދި އިސްރާއީލަށް އޮތް އެންމެ ބުއްދިވެރި ގޮތަކީ ސީދާ ހަނގުރާމައަކަށް ނުގޮސް އީރާން ދާހިލީ ހަމަނުޖެހުންގަނޑެއްގެ ތެރެއަށް ވައްޓާލައިގެން އެޤައުމުގެ ވެރިކަން ފޮރޮޅާލުންކަމަށް ދެ ޤައުމުން ދެކެއެވެ.