އަތޮޅުތެރޭގެ ރަށްތަކަށް ޓެކްސްޓް ފޮތްތައް ފޮނުވުމަށް ކުރަމުންގެންދާ މަސައްކަތްތަކުގެ ދަށުން ގިނަ ރަށްތަކެއްގެ ސްކޫލްތަކަށް ޓެކްސްޓް ފޮތްތައް ފޮނުވައިފިކަމަށް އެޑިއުކޭޝަން މިނިސްޓްރީން ބުނެފިއެވެ.

ދައުލަތުގެ މީޑިއާއާ ވާހަކަދައްކަމުން އެޑިއުކޭޝަން މިނިސްޓަރު ޑރ.އިސްމާޢީލް ޝަފީޢު ވިދާޅުވީ ކުރިއަށްއޮތް ދިރާސީ އައު އަހަރުގެ ކިޔެވުން ފެށުމުގެ ކުރިން ޓެކްސްޓް ފޮތްތައް ފޮނުވައި ނިންމުމަކީ އެ މިނިސްޓްރީގެ އަމާޒުކަމަށެވެ. މިނިސްޓަރު ވިދާޅުވީ ޓެކްސްޓް ފޮތްތައް ގެންދިއުމުގައި ދަތިތަކެއް ކުރިމަތިވި ނަމަވެސް، ކަނޑައެޅިފައިވާ ތާރީހަށް އެކަންކޮށް ނިންމާލެވޭނޭކަމަށެވެ. އެގޮތުން މިހާރުވެސް 60 އިންސައްތަ ރަށަށް ޓެކްސްޓް ފޮތްތައް ފޮނުވާފައިވާކަން މިނިސްޓަރު ވިދާޅުވިއެވެ.

ފޮތްތައް އަތޮޅުތެރޭގެ ރަށްތަކަށް ފޮނުވުމުގައި ހުރި ދަތިތަކާ ބެހޭގޮތުން ވާހަކަދައްކަވަމުން މިނިސްޓަރު ވިދާޅުވީ ބޮޑުތަކުރުފާނުމަގު ތަރައްޤީކުރުމުގެ މަސައްކަތް ކުރިއަށްދާތީވެ، ބޯޓުފަހަރަށް ފޮތްތައް ގެންދިއުމުގައިވެސް ކޮންމެވެސް ވަރެއްގެ އުނދަގޫތަކެއް ހުރިކަމަށެވެ.

ފޮތްތައް ހަމަކުރުމުގެ މަސައްކަތް ކުރިން އަރަބިއްޔާ ބޮޑު ގުދަނެއްގައި ކުރަމުން އައިނަމަވެސް މިހާރު އެ މަސައްކަތް ކުރިއަށްގެންދަނީ، އަމީނިއްޔާ ސްކޫލްގައެވެ.

އަތޮޅުތެރެއަށް ގެންދިއުމަށް ފޮތްތައް ހަމަކުރަނީ... ފޮޓޯ: ދައުލަތުގެ މީޑިއާ

ދިރާސީ އައު އަހަރަށް ދަރިވަރުންނަށް ބޭނުންވާ ޓެކްސްޓް ފޮތްތައް ފޮނުވުމުގެ މަސައްކަތް ފަށާފައިވަނީ މިދިޔަ ޑިސެމްބަރުމަހުގެ ތެރޭގައެވެ. ސްކޫލްތަކާއި އެޑިއުކޭޝަން މިނިސްޓްރީ ގުޅިގެން، ދިރާސީ އައު އަހަރު ފެށުމުގެ ކުރިން ހުރިހާ ދަރިވަރުންނަށް ބޭނުންވާ ޓެކްސްޓް ފޮތްތައް ފުރިހަމައަށް ލިބިފައިވާކަން ކަށަވަރު ކުރުމަށްޓަކައި، ދުރާލާ ގިނަ މަސައްކަތްތަކެއް ކުރަމުންދާކަން މިނިސްޓްރީން ވަނީ މީގެ ކުރިންވެސް ބުނެފައެވެ.

ކުރިއަށްއޮތް ދިރާސީ އައު އަހަރުގެ ކިޔެވުން ފެށުމަށް ހަމަޖެހިފައިވަނީ، ޖެނުއަރީމަހުގެ 27 ވަނަ ދުވަހެވެ. ނިމުނު ދިރާސީ އަހަރުގެ ބޮޑުޗުއްޓީއަށް ދަރިވަރުން ގޮސްފައިވަނީ، ޑިސެމްބަރުމަހުގެ 25 ވަނަ ދުވަހުއެވެ.