ދިރާގު ދިވެހި ޕްރިމިއާ ލީގުގައި ބިސްބުރު ކްލަބާއި ދިއްދޫ ބައްދަލުކުރި ފޯރިގަދަ މެޗު 1-0 ގެ ހަނި ނަތީޖާއަކުން ކާމިޔާބުކޮށް، ބިސްބުރުން މި ސީޒަނުގެ ލީގުގައި އެ ޓީމުގެ ފުރަތަމަ މޮޅު ހޯދައިފިއެވެ.

ގަލޮޅު ރަސްމީ ދަނޑުގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު ޖަހާފައިވަނީ މެޗުގެ ފަހު ހާފުގައެވެ. މި ލަނޑު ބިސްބުރަށް ކާމިޔާބުކޮށްދިނީ އެ ޓީމުގެ ބިދޭސީ ފޯވާޑް ބަރްނަބާސް ފްރައިޑޭއެވެ.

މި މެޗުގެ ބޮޑުބައި ދިއްދޫ ޓީމުން ފުރިހަމަކުރަން ޖެހުނީ އެއް ކުޅުންތެރިއަކު މަދުކޮށެވެ. އެއީ މެޗުގެ ތެރޭގައި އެ ޓީމުގެ ނޫހަށް ދެ ރީނދޫ ކާޑާއެކު ރަތް ކާޑެއް ދައްކައި ދަނޑުން ފޮނުވާލުމާ ގުޅިގެންނެވެ. ނަމަވެސް، އެއް ކުޅުންތެރިއަކު މަދުކޮށް ކުޅެމުންދިޔަ ދިއްދޫ ޓީމުން ވަނީ ބިސްބުރަށް ލަނޑު ޖަހާނެ ފުރުސަތުތައް ހަނިކުރުމަށް ގަދައަޅައި މަސައްކަތް ކޮށްފައެވެ.

ދިއްދޫ އާއި ބިސްބުރު ބައްދަލުކުރިމެޗްގެ ތެރެއިން..

މިއީ މި ފަހަރުގެ ޕްރިމިއާ ލީގުގައި ބިސްބުރަށް ލިބުނު ފުރަތަމަ 3 ޕޮއިންޓެވެ. ލީގުގައި އެ ޓީމު ކުޅުނު ފުރަތަމަ މެޗުން ކްލަބް އީގަލްސް އަތުން ވަނީ 3-1 ގެ ނަތީޖާއަކުން ބަލިވެފައެވެ.

މި މެޗަށްފަހު އިންޓަނޭޝަނަލް ބްރޭކާ ގުޅިގެން ދިވެހި ޕްރިމިއާ ލީގުގެ ކުޅުން މިހާރު ވަނީ ވަގުތީ ގޮތުން މެދުކަނޑާލާފައެވެ. ލީގުގެ ކުޅުން ދެން އަލުން ފެށުމަށް ހަމަޖެހިފައިވަނީ އަންނަ އޮކްޓޯބަރު މަހުގެ 9 ވަނަ ދުވަހުއެވެ.