ނިމިގެންދިޔަ ޕީއެންސީގެ ކޮންގްރެސް އިން އެ ޕާޓީގެ 2028ގެ ކެމްޕެއިން ޓީމު ވަނީ ވަރަށް ބޮޑަށް ތަރުތީބު ކުރެވިފައިވާ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް ޢަބްދުﷲ ވިދާޅުވެއްޖެ އެވެ.

ޕީއެންސީގެ ކޮންގްރެސްގެ ކާމިޔާބީ ފާހަގަކުރުމަށް މިރޭ ބޭއްވި ހަފްްލާގައި އަބްދުއްރަހީމް ވަނީ ކޮންގްރެސް ކާމިޔާބުކަމާއެކު ނިންމާލެވުނީތީ ރައީސްގެ ނަންފުޅުގައި ހުރިހާ މެންބަރުންނަށް ޝުކުރު އަދާކުރައްވާފަ އެވެ.

އަދި ވިދާޅުވީ ރެއާ ދުވާލު މެންބަރުން ކުރި މަސައްކަތުގެ ނަތީޖާ ކަމަށެވެ. ހާއްސަކޮށް އިހްލާސްތެރިކަމާއި ވަފާތެރި ކަމާއެކު މިދިޔަ ދެ މަހެއްހާ ދުވަހުގެ ތެރޭގައި މެންބަރުން ކޮށްދެއްވި މަސައްކަތުގެ ނަތީޖާ ކަމުގައި ވިދާޅުވި އެވެ.

އަބްދުއްރަހީމް ވިދާޅުވީ ކޮންގްރެސް އިން ލިބުނު ހިތްވަރާއި ފިލާވަޅުގެ އަލީގައި އެންމެ ވަގުތެއްވެސް ނަގައި ނުލައި 2028 އަށް އަމާޒު ހިފަން ޖެހޭ ކަމަށެވެ. އަދި މިހާރު އޮތް ޖޯޝާ ފޯރީގައި މަސައްކަތްކޮށްފިނަމަ ރައީސް މުޢިއްޒަށް 2028 ކާމިޔާބު ކުރެވޭނެ ކަމުގައި ވިދާޅުވި އެވެ.

"އަަޅުގަނޑުމެންގެ ޓީމު މިގޮތުގައި ޖޯޝުގައި މި ފޯރީގައި މަސައްކަތްކޮށްފިއްޔާ އިރާދަކުރެއްވިއްޔާ 2028 ގެ ރިޔާސީ އިންތިޚާބު ފަސޭހަ ކަމާއެކު އަޅުގަނޑުމެންނަށް ރައީސް ޑރ. މުޙައްމަދު މުޢިއްޒަށް ކާމިޔާބުކޮށް ދެވޭނެ. ތިޔަ ބޭފުޅުން ތިޔަ ދައްކަވައިދެއްވީ ތިޔަ ބޭފުޅުންގެ ކިބައިގައި ހުރި ޕާޓީގެ ރޫހު. ޕާޓީގެ ޖޯޝް. ރައީސް ޑރ. މުޙައްމަދު މުޢިއްޒާއެކު ތިޔަ ބޭފުޅުން ސާބިތުވެ ތިއްބެވި މިންވަރު،" އަބްދުއްރަހީމް ވިދާޅުވި އެވެ.

އަބްދުއްރަހީމް ވިދާޅުވީ ރާާއްޖެއަށް ބޭނުންވަނީ ބިނާކުރަނިވި ފިކުރުގެ ވެރިއެއް ކަމަށާ އެ ފިކުރު އޮތީ ރައީސް ޑރ. މުޙައްމަދު މުޢިއްޒު ކަމަށެވެ.

ޕީއެންސީގެ ކޮންގްރެސްގައި އެ ޕާޓީން ވަނީ 2028 ގެ ރިޔާސީ ޓިކެޓް ރައީސް މުޢިއްޒަށް އަރުވާފަ އެވެ.