ސަރުކާރުގެ މައި ހޮސްޕިޓަލް، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ވޭތުވެދިޔަ ނުވަ އަހަރުގެ ތެރޭގައި އުފަންވި ކުދިންގެ ތެރެއިން 4.24 އިންސައްތަ ކުދިންނަކީ އުފަންވީއިރު އެކި ކަހަލަ އައިބުތައް (birth defects) ހުރި ކުދިން ކަމަށް އާ ދިރާސާއަކުން ދައްކައިފިއެވެ.

"ބާތް ޑިފެކްޓް ސަވައިލެންސް އިން ދަ މެއިން ގަވަރްންމަންޓް ރިފަރަލް ހޮސްޕިޓަލް އޮފް މޯލްޑިވްސް ފްރޮމް 2016 ޓު 2024" ގެ ނަމުގައި ކުރިއަށް ގެންދިޔަ މި ދިރާސާއަކީ އައިޖީއެމްއެޗްގެ ކުޑަކުދިންގެ ޚާއްޞަ ޑޮކްޓަރުން ކަމަށްވާ ޑރ. އަޙްމަދު ފައިސަލް، ޑރ. ހަމްސާ ޢާރިފް ރަޝީދު، ޑރ. މިހުނާތު މުޞްޠަފާ އަދި ޑރ. ނިޔާޝާ އިބްރާހީމް އެކުވެގެން ތައްޔާރުކުރައްވާފައިވާ ދިރާސާއެކެވެ.

މި ދިރާސާގައި 2016 އިން 2024 ވަނަ އަހަރާ ހަމައަށް އައިޖީއެމްއެޗްގައި ދިރިހުއްޓާ އުފަންވި 17,188 ކުދިންގެ މަޢުލޫމާތު ވަނީ ބަލާފައެވެ. އޭގެ ތެރެއިން 729 ކުދިންގެ ކިބައިގައި އުފަންވީއިރު އައިބު ހުރިކަން ފާހަގަކުރެވިފައިވާއިރު، ޖުމްލަ 1,215 އައިބެއް އެ ކުދިންގެ ކިބައިން ފެނިފައިވެއެވެ.

އައިބު ހުރި ކުދިންގެ ނިސްބަތް: ކޮންމެ 1,000 ކުދިންނަށް 42.4 ކުދިން.

އެންމެ ގިނަ އައިބު: އެންމެ ގިނައިން ފެނިފައިވަނީ ހިތާއި ލޭހިނގާ ނިޒާމުގެ އައިބުތަކެވެ (28.7 އިންސައްތަ).

މައިންގެ ޞިއްޙަތު: އައިބު ހުރި ކުދިން އުފަންވި މައިންގެ ތެރެއިން 107 މައިންނަކީ (15 އިންސައްތަ) މާބަނޑު ދުވަސްވަރު ހަކުރު ބަލި ނުވަތަ ޖެސްޓޭޝަނަލް ޑައިބެޓީސް ހުރި މީހުންނެވެ.

ނިޔާވި ކުދިން: ހޮސްޕިޓަލުން ދޫކޮށްލުމުގެ ކުރިން 27 ކުއްޖަކު ވަނީ ނިޔާވެފައެވެ. މީގެ ތެރެއިން ގިނަ ކުދިން ނިޔާވީ ފުއްޕާމޭ ރަނގަޅަށް އުފެދިފައި ނެތުމުގެ ސަބަބުންނެވެ.

މީގެ އިތުރުން، އައިބު ހުރި ކުދިންގެ ތެރެއިން 312 ކުދިންނަކީ ދުވަސް ނުފުރާ އުފަންވި ކުދިން ކަމަށާއި، އޭގެ ތެރެއިން ގިނަ ކުދިން އުފަންވެފައިވަނީ ސިޒޭރިއަން ހަދައިގެން ކަމަށް މި ދިރާސާއިން އެނގެއެވެ. އަދި އަންހެން ކުދިންނަށްވުރެ ފިރިހެން ކުދިންގެ ކިބައިގައި މިފަދަ އައިބުތައް ހުރި މިންވަރު އިތުރުކަންވެސް ފާހަގަކޮށްފައިވެއެވެ. 

ހަމައެހެންމެ 82 ކުއްޖަކަށް އުފަންވުމާއެކު ނޭވާލުމަށް އެހީތެރިވެދޭން ޖެހުނު ކަމަށްވެސް މި ދިރާސާގައި ފާހަގަކޮށްފައިވެއެވެ.

ދިރާސާގައި ފާހަގަކޮށްފައިވާ ގޮތުގައި، ރާއްޖޭގައި ތުއްތު ކުދިން މަރުވާ ނިސްބަތް ދަށްވަމުން ދާއިރު، އުފަންވާއިރު ހުންނަ އައިބުތަކުގެ ސަބަބުން ކުދިން ބަލިވުމާއި މަރުވުމުގެ ނިސްބަތް ދަނީ އިތުރުވަމުންނެވެ. އެހެންކަމުން، މިކަން ހައްލުކުރުމަށްޓަކައި މާބަނޑު ދުވަސްވަރު ފޮލިކް އެސިޑް ބޭނުންކުރާ މިންވަރު ބެލުމާއި، ރާއްޖޭގެ އެކި ސަރަހައްދުތަކުގައި މިފަދަ ކަންކަން ދެނެގަންނާނެ ނިޒާމެއް ގާއިމުކުރުން މުހިންމެވެ.

މި ދިރާސާގައި އިތުރަށް ލަފާދީފައިވަނީ، އުފަންވާއިރު ހުންނަ އައިބުތައް ދެނެގަތުމަށް ހަދާ ސްކްރީނިންގްތައް ވަރުގަދަކުރުމަށާއި، ޚާއްސަކޮށް ތެލެސީމިއާ ފަދަ ބަލިތައްވެސް މިފަދަ ދިރާސާތަކުގައި ހިމެނުމަށެވެ. އަދި މާބަނޑު ދުވަސްވަރު ދެވޭ ސިއްހީ ހިދުމަތްތައް އިތުރަށް ހަރުދަނާކޮށް، އާންމުން ހޭލުންތެރިކުރުވުމުގެ މުހިންމުކަންވެސް ޑޮކްޓަރުން ވަނީ ފާހަގަކުރައްވާފައެވެ.

މި ހޯދުންތަކަކީ ސީރިއަސް ހޯދުންތަކެއް ނަމަވެސް، މުޅި ގައުމުގެ ހާލަތު މިއަށްވުރެ ވެސް ގޯސްވުން އެކަށީގެންވާ ކަމަށް ދިރާސާކުރި ޑޮކްޓަރުން ބުނެއެވެ.