ޕެންޝަން ފައިސާ ނުދެއްކެނީ ސިޓީ ކައުންސިލުން ދޭންޖެހޭ ފައިސާ ނުދޭތީ: ވެމްކޯ
ވޭސްޓް މެނޭޖްމެންޓް ކޯޕަރޭޝަން (ވެމްކޯ) އިން މުވައްޒަފުންގެ މުސާރައިން އުނިކުރާ ޕެންޝަން ފައިސާ ގަވާއިދުން ޖަމާނުކުރެވި ވަނީ މާލެ ސިޓީ ކައުންސިލުން އެ ކުންފުންޏަށް ލިބެންޖެހޭ 98 މިލިއަން ރުފިޔާ ނުލިބިވާތީ ކަމަށް އެ ކުންފުނިން ބުނެފިއެވެ.
ވެމްކޯއިން މިކަން ހާމަކޮށްފައިވަނީ އެ ކުންފުނީގެ މުވައްޒަފުންގެ ޕެންޝަން ފައިސާ ނުދައްކާ އޮތް މައްސަލަ ފެންމަތިވުމާ ގުޅިގެން ނެރުނު ބަޔާނެއްގައެވެ.
މި ބަޔާނުގައި ބުނެފައިވަނީ އެ ކުންފުނީގެ މުވައްޒަފުންގެ މުސާރައާއި އިނާޔަތްތައް ދެމުންދަނީ ކުންފުންޏަށް ލިބޭ އާމްދަނީގެ އިތުރުން ސަރުކާރުން ދޭ ސަބްސިޑީގެ އެހީގައި ކަމަށެވެ. އަދި އެ ކުންފުނިން ދޭ ހިދުމަތްތަކަށް ފައިސާ ހޯދުމަށް ދަތިވާކަމަށް މި ބަޔާނުގައި ބުނެފައިވެއެވެ.
އެގޮތުން ޚާއްސަކޮށް، މާލެ ސިޓީ ކައުންސިލުން ވެމްކޯއަށް ދައްކަންޖެހޭ 98 މިލިއަން ރުފިޔާ އަދިވެސް ލިބިފައިނުވާ ކަމަށް އެ ކުންފުނިން ފާހަގަކޮށްފައިވެއެވެ.
އެހެންކަމުން އެތައް ފަހަރެއްގެ މަތިން މާލެ ސިޓީ ކައުންސިލާ ބައްދަލުކޮށް، މަޝްވަރާތައް ކޮށް، މި ފައިސާ ހޯދުމުގައި މިނިސްޓްރީ އޮފް ފިނޭންސްގެ އެހީތެރިކަމަށް އެދިފައިވާ ކަމަށާއި، މިހާރުވެސް އެ މިނިސްޓްރީއާއެކު މަޝްވަރާތައް ކުރިއަށްދާ ކަމަށާއި، ޕެންޝަން ފައިސާ ޖަމާކުރުމުގައި ހުރި ދަތިތަކާ ގުޅިގެން ޕެންޝަން އޮފީހާއެކު ވެސް މަޝްވަރާ ކުރަމުންދާ އެ ކުންފުނިން ބުނެފައިވެއެވެ.
ވެމްކޯއިން އެންމެ ފަހުން ޕެންޝަނަށް ފައިސާ ދައްކާފައިވަނީ 2024 ވަނަ އަހަރުގެ އޮކްޓޫބަރު މަހުއެވެ. އޭގެ ފަހުން ވޭތުވެދިޔަ 14 މަސް ދުވަހު އެ ކުންފުނިން ޕެންޝަން ފައިސާ ދައްކާފައެއް ނުވެއެވެ.
Advertisement
This content is created and paid for by advertisers and does not involve Voice Journalists
