މާލޭގައި ހިންގި އޮޕަރޭޝަނެއްގައި ކިލޯއަކަށް ވުރެ ގިނަ މަސްތުވާތަކެއްޗާ އެކު އަތުލައިގަތް ދެމީހުންގެ ތެރެއިން އެކަކީ ނަފްސާނީ ބަލިމީހެއް ކަމަށާއި ކުރިން ވެސް މީހުން އޭނާ އެކްސްޕްލޮއިޓްކޮށްގެން ކުށްކުރުވި ކަމަށް ބުނެފި އެވެ.

މި މައްސަލައާ ގުޅިގެން ހައްޔަރުކޮށްފައިވަނީ ގދ. މަޑަވެލި / ވަލުތެރޭގެ، މުޙައްމަދު އީވާން ޙާމިދު (23އ) އާއި ހ. ސަކީނާމަންޒިލް / މާލެ، މުޙައްމަދު ރާޢިދު ޢަލީ އަޞްޣަރު (31އ) އެވެ.

މި ޖަނަވަރީ މަހުގެ 5 ވަނަ ދުވަހު ހިންގި އޮަޕެރޭޝަންގައި މަލޭގެ އެޕާޓްމަންޓެއް ބަލައިފާސްކުރިއިރު ކިލޯއަކަށްވުރެ ގިނަ މަސްތުވާތަކެތި ފެނިފައިވާ ކަމަށް ފުލުހުން ބުންޏެވެ.

މި މައްސަލައާ ގުޅިގެން އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ދެމީހުން ވެސް އެންމެ ފުރަތަމަ ބަންދު ކުރީ ހަތް ދުވަހަށެވެ.

އެ މުއްދަތު ހަމަވާތީ ބަންދާ މެދު ގޮތެއް ނިންމަން އިއްޔެ އެމީހުން ވަނީ ކޯޓަށް ހާޒިރު ކޮށްފައެވެ.

އެގޮތުން ހާޒިރުކުރުމުން ރާއިދު އަކީ މަތީ ދަރަޖައަކަށް ނަފުސާނީ ބަލި ހުންނަ މީހެއް ކަމަށާއި އެކަމަށް ރިއާޔަތްކޮށް، ގޭބަންދަށް ނަމަވެސް ދޫކޮށްދޭން އެދޭ ކަމަށް އޭނާ ބުނި ކަމަށް ބަންދުއަމުރުގައިވެއެވެ.

އަދި އޭނާ އަކީ ”އެކްސްޕްލޮއިޓްކޮށްގެން“ ކުށްކުރުވަން ކުރިން ވެސް ބޭނުންކޮށްފައިވާ މީހެއް ކަމަށް ވެސް ބުނެފައި ވެ އެވެ.

އެހެން ނަމަވެސް އެ މައްސަލާގައި ހުށަހަޅާފައިވާ ލިޔެކިއުންތަކަށް ބަލައި، ބަންދުން ދޫކުރަން ޖެހޭ ސަބަބެއް އޮތް ކަމަށް ނުފެންނަ ކަމަށް ނިންމައި، ކޯޓުން އަމުރުކުރީ އޭނާ 30 ދުވަަހަށް ބަންދުގައި ބެހެއްޓުމަށެވެ.

އެ މައްސަލާގައި ހިމެނޭ ދެވަނަ މީހާ ވެސް 30 ދުވަަހަށް ބަންދުކުރަން ކޯޓުން ވަނީ އަމުރުކޮށްފަ އެވެ.