މާލޭގެ ގެއަކުން ވަގަށް އަނބު ބިން މީހަކު ޖަލަށްލާން ކްރިމިނަލް ކޯޓުން އާދިއްތަ ދުވަހު ހުކުމްކޮށްފައެވެ.

މި މައްސަލައިގައި ދައުލަތުން ދައުވާކުރީ ކ. ދިއްފުށީ މީހެއްގެ މައްޗަށެވެ.

އޭނާގެ މައްޗަށް އުފުލާފައިވަނީ އެނގިހުރެ ހުއްދަ ނޫން ތަނަކަށް ވަނުމާއި، ވައްކަން ކުރުމުގެ ކުށުގެ ދައުވާ އުފުލާފައެވެ.

މި ހާދިސާ ހިނގީ މިދިޔަ ސެޕްޓެންބަރު ހައެއްގައެވެ. އެގޮތުން އެދުވަހު ގާތްގަނޑަކަށް 3:05 ކަންހާއިރު، ގ. ކަންޒުދޮށުގެއަށް އެ ގޭގެ ވެރިފަރާތުގެ ހުއްދަ ނެތި އޭނާ ވަދެފައިވާ ކަމަށާ، އެ ގޭގައި ހުރި އަނބު ގަހުން 127 އަނބު ބިނދެފައިވާ ކަމަށް ދައުވާގައިވެއެވެ.

ދައުވާއަށް ޖަވާބުދާރީވާން އެންގުމުން ޝަރީއަތުގެ މަޖިލީހުގައި އޭނާގެ ކުށަށް އިއުތިރާފްވެފައިވާ ކަމަށާ، އަދި އަދަބު ލުއި ކޮށްދޭން އެދިފައިވާ ކަމަށް ހުކުމުގައި ވެއެވެ.

އެހެންކަމުން، ކުށް ސާބިތުވާ ކަމަށް ކަނޑައަޅައި، އެނގިހުރެ ހުއްދަ ނޫން ތަނަކަށް ވަނުމުގެ ކުށުގައި އޭނާ ދެ މަހާއި 12 ދުވަހަށް ޖަލަށް ލުމަށްވަނީ ހުކުމްކޮށްފައެވެ.

އަދި، އޭނާ ބަންދުގައި ހޭދަކުރި މުއްދަތު ކެނޑުމަށްފަހު ވައްކަންކުރުމުގެ ކުށުގައި އޭނާއަށް ވަނީ ހަތަރު މަހާއި 24 ދުވަހުގެ ޖަލު ހުކުމެއް އިއްވާފައެވެ.