ބަންގްލަދޭޝް އިން އޮން އެރައިވަލް ވިސާ ދޭން ނިންމައިފި
އޮންއެރައިވަލް ވިސާ ވަގުތީގޮތުން ނުދޭން ނިންމި ނިންމުން ބަންގްލަދޭޝް ސަރުކާރުން ބަދަލުކޮށްފިއެވެ.
ބަންގްލަދޭޝްގައި ބޭއްވުމަށް ހަމަޖެހިފައިވާ ޤާނޫނު ހަދާ މަޖިލީހުގެ އިންތިހާބާ ދިމާކޮށް އެޤައުމުން ވަނީ އޮންއެރައިވަލް ވިސާ ދިނުން ވަގުތީގޮތުން ހުއްޓާލިކަން އިއުލާނުކޮށްފައެވެ. ބަންގްލަދޭޝްއަށް ޒިޔާރަތްކުރާ ފަރާތްތަކަށް އޮންއެރައިވަލް ވިސާ ދިނުން ހުއްޓާލުމަށް ނިންމީ މަސްދުވަހުގެ މުއްދަތަކަށެވެ. އެ ނިންމުމަށް އަމަލުކުރަން ފަށާގޮތަށް އޮތީ، މާދަމައިން ފެށިގެންނެވެ.
މިކަމާ ގުޅޭގޮތުން ރާއްޖޭގައި ހުންނަ ބަންގްލަދޭޝްގެ އެމްބަސީގެ އޮފިޝަލަކު ވޮއިސްއަށް މައުލޫމާތު ހިއްސާކުރަމުން ވިދާޅުވެފައިވަނީ، އޮންއެރައިވަލް ވިސާ ވަގުތީގޮތުން ނުދޭން ނިންމި ނިންމުން އަނބުރާ ގެންގޮސްފައިވާކަމަށެވެ. އެގޮތުން މިހާރު ކުރިއެކޭ އެއްގޮތަށް ހަމަޖެހިފައިވާ ޤައުމުތަކުގެ ރައްޔިތުންނަށް އޮންއެރައިވަލް ވިސާ ލިބޭނޭކަމަށް އޮފިޝަލް ފާހަގަކުރެއްވިއެވެ.
ބަންގްލަދޭޝްގެ ސަރުކާރުން ކުރިން ނިންމި ނިންމުމާ ގުޅިގެން ރާއްޖޭގެ ހާރިޖިއްޔާއިން ވަނީ އެޤައުމަށް ޒިޔާރަތްކުރާ ފަރާތްތަކުން ސަމާލުވުމަށް އެދިފައެވެ.
ބަންގްލަދޭޝްގެ ސިޔާސީ މަޝްރަހު ވަރަށްބޮޑަށް ބަދަލުވެފައިވާއިރު، މިއީ ހަސީނާގެ ވެރިކަމަށްފަހު ފުރަތަމަ ފަހަރަށް ބާއްވާ އާއްމު އިންތިހާބެވެ. ބަންގްލަދޭޝްގެ ވެރިކަން ދޫކުރައްވައި ހަސީނާ ވަޑައިގެންނެވުމާއެކު، އޭރު ހިނގައިދިޔަ ކަންތައްތަކާ ގުޅިގެން ޤާނޫނު ހަދާ މަޖިލީސްވެސް ވަނީ އުވާލާފައެވެ.
Advertisement
This content is created and paid for by advertisers and does not involve Voice Journalists
