މާދަމާ ބޭއްވުމަށް ހަމަޖެހިފައިވާ އެމް.ޑީ.ޕީގެ ޕްރައިމަރީ އިންތިޚާބުގައި ހުރިހާ މެންބަރުން ވެސް ސުލްހަވެރިކަމާއެކު ވޯޓުލުމުގެ ކަންކަން ނިންމައި ދިނުމަށް އެދިވަޑައިގަންނަވާ ކަމަށް އެމްޑީޕީގެ ވަގުތީ ޗެއަރޕާސަން އަބްދުލްގަފޫރު މޫސަ (ގަޕޯ) ވިދާޅުވެއްޖެ އެވެ. 

ރާއްޖެ ޓީވީއަށް ދެއްވި އިންޓަރވިއުއެއްގައި ގަފޫރު ވިދާޅުވީ އިންތިޚާބާ ގުޅޭ ހުރިހާ މަސައްކަތެއް މިހާރު ނިމިފައިވާކަމަށެވެ. އަދި އެއްވެސް ފަރާތަކުން އުސޫލުން ބޭރުން އިންތިޚާބުގައި އެއްވެސް ކަމެއް ނުކުރުމަށާއި، ކެންޑިޑޭޓުންނާއި، ފޮށިތަކުގައި ތިބޭ ފަރާތްތަކުންނާއި، ސަޕޯޓަރުން އަދި ހުރިހާ ރައްޔިތުންވެސް ވެސް އިންތިޚާބު ވީހާވެސް އޮމާން އަމާން ސުލްޙަވެރިކަމާ އެއްކޮށް ގެންގޮސް ނިންމާލަދެއްވުމަށް ގަފޫރު އެދިވަޑައިގެންނެވި އެވެ.  

ގަފޫރު ވިދާޅުވީ ވޯޓުލުން އޮންނާނީ ހުކުރު ދުވަހުގެ މެންދުރުފަހު 2:00 ން ފެށިގެން ރޭގަނޑު 8:00 އަށްކަމަށެވެެ.

އަދި ވޯޓުލާ މަރުކަޒުތަކަށް މެންބަރުން ގޮސް ވީހާވެސް އަވަހަށް ވޯޓުލުމަށް ހުރިހާ މެންބަރުންނަށް ވެސް އޭނާ ގޮވާލެއްވި އެވެ. ގަފޫރު އިތުރަށް ވިދާޅުވީ ވޯޓުލައި ނިމުމާ އެއްކޮށް އިދާރީ މަސައްކަތްތައް ކުރުމަށްފަހު ވޯޓު ގުނުން ފެށިގެންދާނެ ކަމަށާއި އިތުރު މައްސަލައެއް ދިމާނުވާ ކަމަށްވަންޏާ ވޯޓު ގުނުމުގެ މަސައްކަތް ހުކުރު ދުވަހުގެ ރޭގައި ނިމި ވަގުތީ ނަތީޖާ އިޢުލާނުކުރެވެމުންދާނެ ކަމަށެވެ.