ބަރުބަރީ މިސްކިތް ހުރި ބިމުގައި އިމާރާތްކުރަމުންދާ މިސްކިތް ވަރަށް އަވަހަށް ހުޅުވާނޭކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި މިނިސްޓަރު ޝަހީމް ވިދާޅުވީ، އަންނަ ރޯދަމަހު ބަރުބަރީ މިސްކިތުގައި ނަމާދުކުރެވޭނޭކަމަށެވެ. ބަރުބަރީ މިސްކިތް ތަޅާލުމަށްފަހު އެބިމުގައި މިސްކިތެއްއެޅުމަށް ސަރުކާރުން އެތަން ބަޔަކާ ހަވާލުކުރީ 2024 ވަނަ އަހަރުގެ ޖަނަވަރީމަހުގެ ތެރޭގައެވެ.
މަސްޖިދުލް ޔޫސުފުލް ބަރުބަރީ (ބަރުބަރީ މިސްކިތް) ފަރުމާކޮށްފައިވަނީ އެތަނުގައި 1،400 މީހުންނަށް ނަމާދުކުރެވޭ ގޮތަށެވެ. ތިން ފަންގިފިލާ ހިމެނޭ މި މިސްކިތަކީ އަމިއްލަ ފަރާތެއްގެ ދީލަތި އެހީގައި ބިނާކުރަމުންދާ މިސްކިތެކެވެ.
މިސްކިތްތައް ބިނާކުރުމަށް މި ސަރުކާރުން ފަށާފައިވާ މަސައްކަތްތަކުގެ ދަށުން ހަމައެކަނި މާލެ ސަރަހައްދުގައި ކުރިއަށްދާ މަޝްރޫޢުތަކުގެ އަގު 200 މިލިއަން ރުފިޔާ އާ ގާތްކުރާނޭކަމަށް އިސްލާމިކް މިނިސްޓަރު ވަނީ ވިދާޅުވެފައެވެ. މިނިސްޓަރު ވިދާޅުވެފައިވަނީ މާލެގައި ބާވެފައި ހުރި މިސްކިތްތައް ޒަމާނީ ފެންވަރަށް ތަރައްޤީކުރެވިގެންދާއިރު، އާސާރީ މިސްކިތްތައް ހަމަ އެގޮތުގައި އާސާރީ ތަންތަން ގޮތުގައި ދެމިހުންނާނެ ކަމަށެވެ.
ޒަމާނީ މިސްކިތްތައް ބިނާކުރެވިގެން ދަނީ އިލްމީ އަދި އިޖްތިމާޢީ ގޮތުން ވެސް އެތަންތަން ބޭނުންކުރެވޭނެ ގޮތަށެވެ.
Advertisement
This content is created and paid for by advertisers and does not involve Voice Journalists
