ރާއްޖޭގެ އެކި ރަށަކަށް 56 އެމްބިއުލާންސް ހަވާލުކޮށްފިއެވެ. 

މި ރަށްރަށަށް އެމްބިއުލާންސްތަކުގެ ތަޅުދަނޑި ހަވާލުކޮށްދެއްވީ، ހެލްތު މިނިސްޓްރީގައި ބޭއްވި ރަސްމިއްޔާތުގައި، މިނިސްޓަރު އަބްދުﷲ ނާޒިމް އިބްރާހިމެވެ.  އަދި އެ ރަށްރަށުގެ ހެލްތު ސެންޓަރުތަކާއި ހޮސްޕިޓަލުތަކުގެ ފަރާތުން އެމްބިއުލާންސްތަކާ ހަވާލުވީ އެ ތަންތަނުގެ އިސްވެރިންނެވެ.

ރަށްރަށަށް އެންބިއުލާންސް ހަވާލުކުރުމަށް ބޭއްވި ރަސްމިއްޔާތުގެ ތެރެއިން-- ފޮޓޯ/ ހެލްތު މިނިސްޓްރީ 

 65.3 މިލިއަން ރުފިޔާ ހަރަދުކޮށް، މި ވަގުތު އެމްބިއުލާންސްގެ ހިދުމަތް މެދުކެނޑިފައިވާ ރަށްތައް ފާހަގަކޮށް ކޮންޓްރެކްޓާ ފައިނޭންސް އުސޫލުން އެމްބިއުލާންސްތައް ގެންނަން ސަރުކާރުން މިދިޔަ އަހަރު ހަވާލުކުރީ އެމްޕީއެލްއާއެވެ. އެ ކުންފުނިން ވަނީ މިމަހުގެ ތެރޭގައި 3 ބުރަކަށް ބަހާލައިގެން ހުރިހާ އެމްބިއުލާންސެއް ރާއްޖެއަށް ގެނެސްފައެވެ. 

މިނިސްޓަރު ވިދާޅުވީ އަދި މި އަހަރުގެ ތެރޭގައި އިތުރު 31 ރަށަށް އައު އެމްބިއުލާންސްތައް ގެނެސް، ޚިދުމަތް ދޭން ފަށާނެ ކަމަށެވެ. އަދި މާލެ ސަރަހައްދުގައި ޕެރަމެޑިކް ހިދުމަތް ދިނުމަށް ބޭނުންވާ 10 ޕެރަމެޑިކް އެމްބިއުލާންސް ގެނެސް، އެ ހިދުމަތް ވެސް ފަށާނެ ކަމަށްވެސް މިނިސްޓަރު ވިދާޅުވިއެވެ. 

މިނިސްޓަރު އަބްދުﷲ ނާޒިމް އިބްރާހިމް-- ފޮޓޯ/ ހެލްތު މިނިސްޓްރީ

މި ރަސްމިއްޔާތުގައި މިނިސްޓަރު ނާޒިމް ވިދާޅުވީ، ސިއްޙީ ނިޒާމުގައި ގިނަ ގޮންޖެހުންތަކެއް އެބަހުރި ކަމަށެވެ. އެ ގޮތުން، އާބާދީ ބެހިފައިވާ ގޮތުން ޚިދުމަތް ފޯރުކޮށްދިނުމުގައި ގޮންޖެހުންތައް ދިމާވާކަމާއި، ދެމެހެއްޓެނިވި ގޮތެއްގައި އެމްބިއުލާންސްގެ ޚިދުމަތް ނުދެވި، ބައެއް ރަށްތަކަށް އެމްބިއުލާންސް ލިބުނު ނަމަވެސް، މެއިންޓަނަސް ނުކުރެވެވުމުގެ ސަބަބުން ހަލާކުވެފައި ހުރިކަން މިނިސްޓަރު ފާހަގަކުރެއްވިއެވެ.