ކުރިއަށް އޮތް ލޯކަލް ކައުންސިލް އިންތިހާބަށް ތައްޔާރުވަމުންދާއިރު، އިލެކްޝަންސް ކޮމިޝަނުން ވެރިކަންކުރާ ޕީއެންސީއަށް ޑޭޓާތައް ހިއްސާކުރަމުންދާކަމަށް އިދިކޮޅު އެމްޑީޕީން ތުހުމަތުކޮށްފިއެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޑީޕީގެ ކައުންސިލް އިންތިހާބުގެ ޑެޕިއުޓީ ސްޕޯކްސް ޕާސަން ހަސަން ހުސައިން ވިދާޅުވީ، އިލެކްޝަންސް ކޮމިޝަނުގެ އަމަލުތައް ފެނިގެންދަނީ ލޯކަލް ކައުންސިލް އިންތިހާބުގައި ޕީއެންސީއަށް ކަންކަން ފަހިވާނޭހެން ކަމަށެވެ. އެގޮތުން އިލެކްޝަން ކޮމިޝަނުގެ ފަރާތުން މިހާރުވެސް ބައެއް ކަންކަން ފެންނަމުންދާކަން ހަސަން ފާހަގަކުރެއްވިއެވެ.
ހަސަން ވިދާޅުވީ އަމިއްލަ ގޮތުން ކުރިމަތިލާ ކެނޑިޑޭޓުންނަށް އީފާސްމެދުވެރިކޮށް ތާއީދު ދިނުމުން އެ މައުލޫމާތުތައް ވަގުތުން ޕީއެންސީއަށް ލިބެމުންދާކަން ފާހަގަކުރެވިފައި އެބަހުރިކަމަށާއި، މިއީ ވަރަށްބޮޑު މައްސަލައެއްކަމަށެވެ. މިކަމުން އިލެކްޝަނާއި ޕީއެންސީއާ ދެމެދު އަޑިނޭނގޭ މުއާމަލާތްތަކެއް ކުރިއަށްގޮސްފައިވާކަން އެނގޭކަމަށް އޭނާ ފާހަގަކުރެއްވިއެވެ.
އަޅުގަނޑުމެންނަށް ޝައްކުކުރެވޭ އަދި ޔަގީނާ ގާތަށް ބައެއް ކަންކަން އިލެކްޝަންސް ކޮމިޝަންގެ ތެރެއިން ހިނގަމުން އެބަދޭ. މިސާލަކަށް ދަންނަވާ ކަމުގައި ވާނަމަ ކެންޑިޑޭޓުން އަމިއްލަގޮތުން ކުރިމަތިލާ ކެންޑިޑޭޓުންނަށް ތާޢީދުކޮށް އީ-ފާސް މެދުވެރިކޮށް ތާޢީދު ދިނުމުން އެ މަޢުލޫމާތު ވަގުތުން ޕީއެންސީ އަށް އެބަދޭ. އެޕްލިކޭޝަން ހުށަހަޅާފަ އޭނަޔަށް ތާޢީދުދީ އަމިއްލަ މީހަކު ތާޢީދުދިނުމުން އެ މަޢުލޫމާތު ޕީއެންސީ އަށް އެނގުމަކީ ބޮޑު މައްސަލައެއް. އޭގެ މާނައަކީ އެބޭފުޅުންގެ ޕޯޓަލްއަށް އެބޭފުޅުންގެ އިލެކްޝަންގެ މި ޕޯޓަލްއަށް އެކްސެސް އެބައޮތޭ.
ހަސަން ހުސައިން
ނޫސްވެރިންގެ މި ބައްދަލުވުމުގައި އެމްޑީޕީން ވަނީ ކުރިއަށްއޮތް ލޯކަލް ކައުންސިލް އިންތިހާބު ޕީއެންސީއަށް ކާމިޔާބުކޮށްދިނުމުގައި އިލެކްޝަނުން އެކި ގޮތްގޮތުން ވާގިވެރިވަމުންދާކަމަށް ތުހުމަތުކޮށްފައެވެ. އެގޮތުން އިލެކްޝަނުގެ އިސްވެރިން ޕީއެންސީގެ އިސްބޭފުޅުންނާއެކު ސިއްރިޔާތުގައި ބައްދަލުވުންތައް ބާއްވަމުންދާަކން އެމްޑީޕީން ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
