އެފްޑީސީގެ އަމާން ދޯދީގެ އެއްވަނަ ޓަވަރުގައި އަލިފާނުގެ ހާދިސާއެއް
ހުޅުމާލޭގެ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްގީކުރަމުންދާ "އަމާން ދޯދީ" މަޝްރޫއުގެ އެއްވަނަ ޓަވަރުގައި ކުޑަ އަލިފާނުގެ ހާދިސާއެއް ހިނގައިފިއެވެ.
އެފްޑީސީން މިއަދު އެކްސްގައި ކުރި ޕޯސްޓެއްގައި ބުނެފައިވަނީ، އަމާން ދޯދީ 1 ގައި ހިނގި މި ހާދިސާގެ މައުލޫމާތު ލިބުމާއެކު އެމްއެންޑީއެފްގެ ފަޔަރ އެންޑް ރެސްކިއު ސަރވިސްއިން ވަނީ ވަރަށް އަވަހަށް ހަރަކާތްތެރިވެ، އަލިފާން ކޮންޓްރޯލްކޮށްފައި ކަމަށެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާކަން އެ ކޯޕަރޭޝަނުން ވަނީ ކަށަވަރުކޮށްދީފައެވެ.
މިހާރު އެ ސަރަހައްދު ވަނީ ރައްކާތެރިކުރެވިފައި ކަމަށާއި، ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ބަލަންޖެހޭ ކަންކަން ބަލަމުންދާ ކަމަށްވެސް އެފްޑީސީން މައުލޫމާތު ދެއެވެ.
މި ހާދިސާއާ ގުޅިގެން ބައެއް އަމިއްލަ ވައިބަރ ގްރޫޕްތަކުގައި، އިމާރާތުގެ ވެންޓިލޭޝަން ޝާފްޓްތަކާއި ކުނި އުކާލުމާ ގުޅޭގޮތުން ހަގީގަތާ ހިލާފު މައުލޫމާތު ފަތުރަމުންދާކަން ފާހަގަކުރެވިފައިވާ ކަމަށް އެފްޑީސީން ބުންޏެވެ. އެހެންކަމުން، ކަމުގެ ހަގީގަތް އޮޅޭގޮތަށް ކަށަވަރުނުވާ މައުލޫމާތު ނުފެތުރުމަށާއި، އެފަދަ ކަންކަމުގައި ޒިންމާދާރުކަމާއެކު އަމަލުކުރުމަށް އެ ކޯޕަރޭޝަނުން ވަނީ ހުރިހާ ފަރާތްތަކަކަށް އިލްތިމާސްކޮށްފައެވެ.
އެފްޑީސީން އިތުރަށް ބުނެފައިވަނީ މި ހާދިސާއާ ގުޅޭ އިތުރު މައުލޫމާތު ކުރިއަށް އޮތް ތަނުގައި ހިއްސާކުރަމުންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
