އަަސާސީ ހުރިހާ ޓެސްޓެއް ހެދޭ ގޮތަށް މިއަހަރު ހުރިހާ ރަށެއްގައި ލެބޯޓަރީ ހަދާ ނިންމާނެ: މިނިސްޓަރު
އަަސާސީ ހުރިހާ ޓެސްޓެއް ހެދޭ ގޮތަށް މިއަހަރުގެ ނިޔަލަށް ހުރިހާ ރަށެއްގައި ލެބޯޓަރީ ހަދާ ނިންމާނެ ކަމަށް ހެލްތް މިނިސްޓަރު އަބްދުﷲ ނާޘިމް އިބްރާހީމް ވިދާޅުވެއްޖެެވެ.
މިނިސްޓަރު މިހެން ވިދާޅުވީ ރައީސުލްޖުމްހޫރިއްޔާގެ އޮފީހުގެ ތަރުޖަމާން ހީނާ ވަލީދު ގެނެސް ދެއްވާ ތަރުޖަމާނާއެކުގެ މި ހަފްތާގެ އެޕިސޯޑްގައި ވާހަކަ ދައްކަވަމުންނެވެ.
މިނިސްޓަރު ވިދާޅުވި ގޮތުގައި ރައީސް މުޢިއްޒުގެ ޒަޢާމަތް ފެށުނުއިރު 76 ރަށެއްގައި އެންމެ އާދައިގެ ޓެސްޓްތައް ވެސް ހެދޭނެ ގޮތެއް ނެތެވެ. ނަމަވެސް މިހާރު އެކަން ބަދަލުކޮށްފައިވާ ކަމަށް ވިދާޅުވި އެވެ.
އަދި ސަރުކާރުގެ އަމާޒަކީ މީހުން ދިރިއުޅޭ ހުރިހާ ރަށެއްގައި އަަސާސީ ހުރިހާ ޓެސްޓެއް ހެދޭނެ ގޮތް ފަހި ކުރުމެވެ. އެ މަސައްކަތް ހުއްޓުމެއް ނެތި ކުރަމުންދާ ކަމަށް ވިދާޅުވި އެވެ. އެގޮތުން މިހާރުގެ އެންމެ ބޮޑު އަމާޒަކީ އަހަރު ނިމުމުގެ ކުރީން އަަސާސީ ހުރިހާ ޓެސްޓެއް ހެދޭ ގޮތަށް ހުރިހާ ރަށެއްގައި ލެބޯޓަރީ ހަދާ ނިންމުން ކަމުގައި ވިދާޅުވި އެވެ.
ސިއްހި ފަރުވާ ލިބޭނެ ގޮތެއް ނެތި އެއްވެސް ރައްޔިތަކު ހަވާސާ ވުމަކީ މި ސަރުކާރުން އެދޭ ގޮތް ނޫން ކަމަށާ އެގޮތަށް ވާން ދޫކޮށް ނުލާނެ ކަމަށް ވެސް ވިދާޅުވި އެވެ. އަދި ވިދާޅުވީ އާބާދީގެ ކުޑަ، ބޮޑު މިނަށް ބެލުމެއް ނެތި ސިއްހީ އަސާސީ ފަރުވާ ލިބޭނެ ކަން ސަރުކާރުން ކަށަވަރު ކުރާނެ ކަމަށެވެ.
Advertisement
This content is created and paid for by advertisers and does not involve Voice Journalists
