ރޯދަހަދިޔާގެ ގޮތުގައި ސަރުކާރުން ރައްޔިތުންނަށް މިއަދުން ފެށިގެން މަސްދަޅުކޭސް ދޫކުރުމަށް ވަނީ ނިންމާފައެވެ. މަސްދަޅުކޭސް ދޫކުރުމުގެ މަސައްކަތް މިރޭ ފެށުމަށް ނިންމާފައިވާއިރު، އިއްޔެ މެންދުރު 12 އިން ފެށިގެން ވަނީ ނަމްބަރު ދޫކުރަން ފަށާފައެވެ. މަސްދަޅު ދޫކުރަން ފެށުމަށް ނިންމާފައިވަނީ މިރޭ 20:30 ފެށިގެންނެވެ. 

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވެފައިވަނީ މަސްދަޅުހޯދުމަށް މިފަހަރު ރައްޔިތުން ކިއުގަ ޖެހެން ނުޖެހޭނެކަމަށް ވިދާޅުވެފައެވެ. ކުރީ ފަހަރުތަކުގައި މަސްދަޅުކޭސް ހޯދުމަމަށް ދިގު ކިއޫއެއް ދަމާލާފައި އޮތެވެ. އަދި ކިއުތަކުގައި ގިނައިރު ތިބެންޖެހުނެވެ.

މިކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ވަޒީރު އާދމް ޝަރީފް ވިދާޅުވީ، މިފަހަރު މަސްދަޅު ދޫކުރުމުގެ އިންތިޒާމްތައް ހަމަޖެހިފައި ހުންނާނީ، ކިއުގަ ނުޖެހި އެކަން ކުރެވޭ ގޮތަށްކަމަށެވެ. އެގޮތުން  ކިއުގައި ނުޖެހި، ޕޯޓަލް http://roadhahadhiya.mv އިން ޓޯކަން ނެގޭއިރު،. މުޅި ރާއްޖޭގެ ހުރިހާ ގޭބިސީތަކަށް ބޭނުންވާ 118673 މަސްދަޅު ކޭސް މިހާރު ވަނީ ތައްޔާރުކޮށް ނިމިފައިކަމަށްވެސް ވަޒީރު ވިދާޅުވިއެވެ.

މިދިޔަ ފަހަރު މަސްދަޅު ހޯދަން ހިޔާ ޓަވަރު ކައިރީ ކިއު ދަމާލާފައި.. ފޮޓޯ: ވޮއިސް

މިފަހަރު ގްރޭޓާ މާލެ ސަރަހައްދުގެ 15 ތަނަކުން މަސްދަޅު ދޫކުރުމަށް ވަނީ ނިންމާފައެވެ. އެއީ މާލޭގެ 8 ސަރަހައްދަކާއި ހުޅުމާލެ 6 ސަރަހައްދެއްގެ އިތުރުން ވިލިމާލޭގެ 1 ސަރައްދުންނެވެ.

މިދިޔަ އަހަރާ އަޅާބަލާއިރު މަސްދަޅު ދޫކުރާ ތަންތަނުގެ އަދަދު އިތުރުކޮށްފައިވާއިރު، މީގެ ބޭނުމަކީ ވީހާވެސް އަވަހަކަށް ރައްޔިތުންނަށް މަސްދަޅު ދޫކުރުމުގެ ކަންކަންކޮށް ނިންމުންކަމަށް ވުޒާރާއިން ބުނެއެވެ. ކޮންމެ ރެއަކުވެސް މަސްދަޅު ދޫކުރާ ތަންތަނުން 300 ޓޯކަންއަށް މަސްދަޅު ދޫކުރުމަށް ވަނީ ނިންމާފައެވެ. 

މާލޭ ސަރަޙައްދުގައި މަސްދަޅުކޭސް ދޫކުރުމަށް ހަމަޖެހިފައިވަނީ ހުކުރުދުވަސް ފިޔަވައި ކޮންމެ ރެއަކު 8:30 އިން 11:00 އަށެވެ. މި މަސައްކަތް ކުރިއަށް ދާނީ އަންނަ މަހުގެ 11 ވަނަ ދުވަހުގެ ނިޔަލަށެވެ.

ރޯަދަ ހަދިޔާގެ ގޮތުގައި ސަރުކާރުން ނިންމާފައިވަނީ ކޮންމެ ގޭބިސީއަކަށް 48 ދަޅުގެ މަސްދަޅު ކޭހެއް ހަދިޔާ ކުރުމަށެވެ.