ފޯޅަވަހީގެ ސިޔާދަތީ ބާރުވެރިކަން ދިވެހީންނަށް ލިބުމުގެ ފުރުސަތު އަދި ނުގެއްލޭ ކަމުގައި ކުރީގެ ރައީސް އަދި ރައްޔިތުންގެ މަޖިލީހުގެ ކުރީގެ ރައީސް މުޙައްމަދު ނަޝީދު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އެކްސްގައި ކުރެއްވި ޕޯސްޓެއްގަ އެވެ.

ރައީސް ނަޝީދުގެ ޕޯސްޓްގައި ވިދާޅުވީ ފޯޅަވަހި ހިމެނޭ ޗާގޯސް ޖަޒީރާތައް މޮރިޝަސްއަށް ދިނުމުގެ ބިލް، އިނގިރޭސި މަތިގެ (ހައުސް އޮފް ލޯޑްސް) ގެ ވޯޓަށް ތައްޔާރުވެފަައި ވަނިކޮށް އަނެއްކާ ބިލަށް ވޯޓް ދިނުން ވަނީ ފަސްކޮށްފައި ކަމަށެވެ.

އެމަނިކުފާނު ވަނީ ފޯޅަވަހީގެ ސިޔާދަތީ ބާރުވެރިކަން ދިވެހިރާއްޖެއަށް ލިބުމުގެ ފުރުސަތު އަދި ނުގެއްލޭ ކަމަށް ވިދާޅުވެފަ އެވެ.

ޗާގޮސް އައިލެންޑްސް ނުވަތަ "ފޯޅަވަހި" ގެ ނަމުން މަޝްހޫރުވެފައިވާ ރަށްތަކުގެ މިލްކުވެރިކަން މޮރިޝަސްއަށްވުރެ ހައްގުކަންބޮޑީ ރާއްޖެއަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެސް ދާދި ފަހުން ވަނީ ވިދާޅުވެފަ އެވެ.

ތަފާސްހިސާބުތަކަށް ބަލާއިރު، މޮރިޝަސްގެ ވެރިރަށް ޕޯޓް ލުއިސްއާ ފޯޅަވަހި އޮތީ 1,300 މޭލު ދުރުގައެވެ. ނަމަވެސް ރާއްޖޭގެ ވެރިރަށް މާލެއާ ފޯޅަވަހި އޮތީ އެންމެ 310 މޭލު ދުރުގައެވެ. މީގެ އިތުރުން، ފޯޅަވަހިން ފެނިފައިވާ 900 އަހަރަށްވުރެ ބާދަވެފައިވާ މަހާނަގާތަކުގައި ދިވެހި ބަހުން ލިޔުންތައް ހުރިކަމީ އެތަނާއި ދިވެހިންނާ އޮތް ޒަމާންވީ ގުޅުމުގެ ހެއްކެކެވެ. 16 ވަނަ ގަރުނުގެ ދިވެހި ރަސްކަލެއްގެ ފަތްކޮޅުތަކުންވެސް ފޯޅަވަހީގެ މައްޗަށް ދިވެހި ދައުލަތުގެ ބާރު ހިނގާކަން އެނގެން އެބައޮތެވެ. މިއީ މޮރިޝަސްގައި އިންސާނުން ވަޒަންވެރިވުމުގެ 100 އަހަރު ކުރިއެވެ.