ކުޅުދުއްފުށީ ސިޓީއަށް ބޭނުންވަނީ އަމަލީގޮތުން ތަރައްޤީގެ ކަންކަން ގެނެސްދޭނޭ ޓީމެއްކަމަށާއި، ޕީއެންސީގެ ޓީމް ވެގެންދާނީ އެ ސިތީއަށް އަމަލީގޮތުން ތަރައްޤީ ގެނެސްދޭނޭ ބަޔަކަށް ކަަމަށް ޕީއެންސީގެ ޓިކެޓުގައި މޭޔަރުކަމަށް ވާދަކުރައްވާ އިބްރާހިމް ހަސަން (ކުޑަ އިއްބެ) ވިދާޅުވެއްޖެއެވެ.

ކުޅުދުއްފުށި ސިޓީގައި ޕީއެންސީގެ ކެމްޕެއިން ލޯންޗު ކުރުމަށް ބޭއްވި ބޮޑު ޖަލްސާގައި ވާހަކަދައްކަވަމުން ކުޑަ އިއްބެ ވަނީ މީގެކުރިން ތަޖުރިބާ ކުރެވުނު ކަންކަން ހިއްސާކުރައްވާފައެވެ. އެގޮތުން އިދިކޮޅުން މީގެކުރިން އެންމެބޮޑަށް ވިއްކަން މަސައްކަތްކުރި ހޯމްސްޓޭ ފަދަ ދާއިރާތައް ކުރިއަށް ގޮސްފައިނުވާކަން އޭނާ ވަނީ ފާހަގަކުރައްވާފައެވެ.

ކުޑަ އިއްބެ ވިދާޅުވީ، ހަގީގީ ތަރައްގީއަކީ ސިޓީގެ ތަނަވަސްކަމާއި މުއްސަނދިކަމާއި މި ސިޓީގެ ގުދުރަތީ ވަސީލަތްތަކުގެ ބޭނުން ހެޔޮގޮތުގައި ހިފައި، އެ ގުދުރަތީ ވަސީލަތްތަކުގެ ފައިދާ އެންމެހާ ރައްޔިތުންނަށް ހަމަހަމަޔަށް ލިބުން ކަމަށެވެ. ހަގީގީ ތަރައްގީއަކީ އިޖުތިމާއީ ގޮތުން މި ރަށަށް ދިމާވެފައިވާ އެންމެ ބޮޑު މައްސަލަކަމުގައިވާ ބޯހިޔާވަހިކަމުގެ މައްސަލައަށް ހައްލެއް ލިބުންކަން ފާހަގަކުރައްވަމުން އޭނާ ވިދާޅުވީ، ފާއިތުވެދިޔަ ދައުރުތަކުގައި މި ސިޓީގެ އިގްތިސާދީ ފުދުންތެރިކަން އިތުރުކުރުމަށް އެކަށީގެންވާ ވަރާ ގާތަށްވެސް މަސައްކަތްކޮށްފައި ނުވުންކަމަށެވެ.

އޭނާ ވިދާޅުވީ ތަރައްޤީގެ ނަމުގައި މިދިޔަ ދުވަސްތަކުގައި ކުރެވުނު ކަންކަމުން ރައްޔިތުންނަށް، އަދި ރައްޔިތުންގެ ޖީބަށް ވަން އެއްޗެއް ނެތް ކަމަށެވެ. ފަށުއި ބަސްތަކުން، ބޮޑެތި ސިޓީތަކަށް މީހުން އަރާނެ ސަބަބުތަކާއި ގޮތްތައް ކިޔައިދެވިދާނެ ކަމަށާއި، ޕީއެންސީގެ ފަރާތުން ވާދަކުރާ ޓީމުން އެކަންކަން އަމަލީގޮތުން ދައްކާނޭކަން ކުޑަ އިއްބެ ވަނީ ފާހަގަކުރައްވާފައެވެ.

ކުޅުދުއްފުށީ ސިޓީ ކައުންސިލަށް ބްލޮކް ގްރާންޓުގެ ގޮތުގައި 50 މިލިއަނެއްހާ ރުފިޔާ ލިބޭއިރު، އަހަރީ ބަޖެޓްގެ ގޮތުގައި 100 މިލިއަން ރުފިޔާ ހަރަދުކުރެވޭއިރު، އެކަމުން ރައްޔިތުންނަށް މިހާތަނަށް ލިބުނު މަންފާއެއް ނެތްކަމަށް ވިދާޅުވިއެވެ. އޭނާ ވިދާޅުވީ އަމާޒަކީ ކުޅުދުއްފުށީ ސިޓީއަކީ ރާއްޖޭގެ ކޮމާޝަން ކެޕިޓަލް ކަމުގައި ހެދުން ކަމަށާއި، ޕީއެންސީގެ ޓީމުން މަސައްކަތް ކުރާނީ، އެ އަމާޒަށް ވާސިލްވުމަށް ކަމަށެވެ.