މާލެ ސިޓީ ގްރޫޕް އޮފް ހޮސްޕިޓަލްސް އިން އަތޮޅުތެރޭގައި ހުޅުވި ފުރަތަމަ އައިނު ފިހާރަ އައްޑޫ ސިޓީގައި ހުޅުވައިފި އެވެ.

އައިނު ހެއްދުމަކީ މާލީ ގޮތުން އޮތް ބޮޑު ބުރައަކަށްވުމުން އެކަމަށް ހައްލެއް ގެނައުމަށް ސަރުކާރުން ވަނީ ސަރުކާރުގެ އައިނު ފިހާރަތަކެއް ހުޅުވަން ނިންމާފަ އެވެ. އެގޮތުން ވަރަށް ކުރު މުއްދަތެއްގެ ތެރޭގައި މާލެއާ ހުޅުމާލޭގައި އައިނު ފިހާރަ ހުޅުވި އެވެ. އަދި އަތޮޅުތެރޭގެ ބޮޑެތި ސިޓީތަކާއި ރަށްތަކުގައި ވެސް އައިނު ފިހާރަ ހަދަން ނިންމި އެވެ.

އެގޮތުން މިއަދު ވަނީ އަތޮޅުތެރޭގައި ހުޅުވި ފުރަތަމަ އައިނު ފިހާރަ އައްޑޫ ސިޓީގައި ހުޅުވާފަ އެވެ.

އެ ކާމިޔާބީއާ ގުޅޭގޮތުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އަބްދުލްރައްޒާގް ހަލީމް ވިދާޅުވީ އަދަކީ އައްޑޫ ސިޓީގެ އިތުރުން ދިވެހިރާއްޖޭގެ ދެކުނުގެ ސިއްހީ ދާއިރާއަށް ތާރީޚީ ގޮތުން ފާހަގަކޮށްލެވޭ މުހިންމު ދުވަހެއްކަމަށެވެ.

"މާލެ ސިޓީ ގްރޫޕް އޮފް ހޮސްޕިޓަލްސްގެ އައިނު ފިހާރައިގެ ޚިދުމަތް އައްޑޫ ސިޓީގައި ފެށިގެން ދިއުމަކީ، ރައްޔިތުންގެ އަސާސީ ބޭނުންތަކާ ސީދާ ގުޅިފައިވާ ނުހަނު ބޭނުންތެރި ކުރިއެރުމެއް,"

އައްޑޫ އިކުއިޓޯރިއަލް ހޮސްޕިޓަލުގައި މި ޚިދުމަތް ގާއިމުކޮށް، މިއަދު ރަސްމީކޮށް އިފްތިތާހު ކުރެވިގެން ދިއުމަކީ އައްޑޫ އަދި ހާއްސަކޮށް ދެކުނުގެ އަތޮޅުތަކުގެ ރައްޔިތުން އެތަށް ފަސޭހަކަމެއް ގެނުވާނެކަމެއްކަން ފާހަގަ ކުރައްވާ އެ މަސައްކަތުގައި ބައިވެރިވި ހުރިހާ ފަރާތްތަކަށް ހަލީމް ވަނީ ޝުކުރު އަދާކުރައްވާފަ އެވެ.

"ހަމައެއާއެކު، އަތޮޅުތަކުގެ ސިއްހީ ޚިދުމަތުގެ ފެންވަރު މަތިކުރައްވައި، ރައްޔިތުންނަށް އިތުބާރު ހުރި ދެމެހެއްޓެނިވި ސިއްހީ ނިޒާމެއް ބިނާކޮށްދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ހަރުދަނާ ސިޔާސަތުތަކަށާއި، އެމަނިކުފާނު ކުރައްވަމުން ގެންދަވާ މިންނެތް މަސައްކަތްޕުޅުތަކަށް ނުހަނު އިޙްތިރާމާއެކު ޝުކުރު ދަންނަވަން," ޙަލީމް ވިދާޅުވި އެވެ.

ހަލީމް ވިދާޅުވި ގޮތުގައި އައިނު ފިހާރައަށް ބޮޑު ޑިމާންޑެއް އެބަ އޮތެވެ. އެ ގޮތުން މިހާތަނަށް 13,000 ވުރެ ގިނަ މީހުންނަށް ވަނީ ހިދުމަތް ދީފަ އެވެ. އަދި އެ އަދަދާއި ގާތް ކުރާ މިންވަރަކަށް ވަނީ އައިނު ވެސް ހައްދައިދީ ހަވާލުކޮށްފަ އެވެ.

ސަރުކާރުގެ އައިނު ފިހާރައިން އެއްވެސް އަގެއްްނެތި އައިނު ހައްދައި ދެ އެވެ. މިއީ ގިނަ ބަޔަކަށް ވަރަށް ބޮޑު ފަސޭހައެއް ގެނުވި ކަމެކެވެ.