މަޝްހޫރު ޓެކްނޮލޮޖީ ކުންފުނި ގޫގުލް އިން އައްޑޫގައި ހިންގުމަށް ހަމަޖެހިފައިވާ މަޝްރޫޢުއިން އެކަނިވެސް އެ ސަރަހައްދަށް ހީނުކުރާވަރުގެ ކުރިއެރުންތަކެއް ލިބިގެންދާނޭކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ގޫގުލްއިން ވަނީ އައްޑޫސިޓީގައި އިންޓަނޭޝަނަލް ސަބްމެރީން ކޭބަލް ލޭންޑިން ސްޓޭޝަނެެއް ގާއިމުކުރުމަށް ނިންމާފައެވެ. މި ޕްރޮޖެކްޓާ ބެހޭގޮތުން މިނިސްޓަރު ސައީދު ވިދާޅުވީ، ގޫގުލްއިން އައްޑޫސިޓީގައި ގާއިމްކުރާ ކޭބަލް ލޭންޑިން ސްޓޭޝަނުގެ ސަބަބުން އައްޑޫގެ ކުރިމަގުގެ އިގްތިސާދީ ހާއްސަކޮށް ޑިޖިޓަލް އިކޮނޮމީގެ ލޭންޑްސްކޭޕް ބަދަލުވެގެންދާނީ ދުނިޔޭގެ ފެންވަރުގައިކަމަށެވެ.

މިނިސްޓަރު ސައީދު ވިދާޅުވީ މިކަން ފެށިގެންދިޔައީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިއުޔޯކަށް ކުރެއްވި ދަތުރުފުޅުގައި ގޫގުލްގެ އިސްފަރާތްތަކާ ބައްދަލުކުރެއްވި ހިސާބުން ކަމަށާއި، އެގޮތުން މިއީ އެމަނިކްފާނު އައްޑޫސިޓީއަށް ގެނެސްދެއްވުމަށް އެދިވަޑައިގަތް ޕްރޮޖެކްޓެއްކަމަށް މިނިސްޓަރު ފާހަގަކުރެއްވިއެވެ.

މިނިސްޓަރު ވިދާޅުވީ، ބިންވެސް ލިބިފަ، ގޫގުލް ޕްރޮޖެކްޓް ފެށުމަށް އެބޭފުޅުން ހަދާ އެކި އެކި އިންވެސްޓިގޭޝަންސްތަކުގެ ހުރިހާ ކަމެއްވެސް ނިމި ކުންފުނިވެސް ރެޖިސްޓްރީ ކޮށް، އިންވެސްޓްމަންޓްވެސް ރެޖިސްޓްރީ ކޮށްފައިވާކަމަށެވެ. އަދި މި މަޝްރޫޢުގެ  އަމަލީ މަސައްކަތް ފެށުމަށް ތައްޔާރުވެފައިވާކަން މިނިސްޓަރުގެ ވާހަކަފުޅުގައި ވަނީ ފާހަގަކުރައްވާފައެވެ.

ގޫގުލްއިން އައްޑޫސިޓީގައި ގާއިމްކުރާ މި މަޝްރޫޢުގެ ސަބަބުން ރާއްޖެ ވެގެންދާނީ އޭޝިޔާ އާއި އޯޝޭނިޔާ އާއި އެފްރިކާ އާއި މެދުއިރުމަތި އަދި ޔޫރަޕް ގުޅުވައިދޭ އިތުބާރު ހުރި ޑިޖިޓަލް ގޭޓްވޭއެއްގެ ގޮތުގައި ކަމަށް ސަރުކާރުން ވަނީ މީގެކުރިން ބުނެފައެވެ.

އައްޑޫ ސިޓީ ހިތަދޫގައި ޤާއިމުކުރެވޭ އިންޓަނޭޝަނަލް މި ކަނެކްޓިވިޓީ ޕޮއިންޓްތަކާއެކު ރާއްޖޭގެ އިޤްތިސާދީ ތަރައްޤީއަށް މަގުފަހިވެ ސަރަހައްދީ މުވާސަލާތީ މަރުކަޒެއްގެ ގޮތުގައި ރާއްޖެ ވެގެންދާނެއެވެ.

ގޫގަލްގެ މި އިންވެސްޓްމަންޓްގެ ސަބަބުން ދުނިޔޭގެ ނަން މަޝްހޫރު ބޮޑެތި އިންވެސްޓަރުން ރާއްޖޭގައި އިންވެސްޓްކުރުމަށް ޝައުޤުވެރިވާ މިންވަރު އިތުރަށް ހާމަވެގެންދާނެ ކަމަށް ސަރުކާރުން ބުނެއެވެ.