އިދިކޮޅު އެމްޑީޕީ އަށް ނިސްބަތްވާ މީހުންނާ ދިމާއަށް ލާދީނީ ކިޔުން ހުއްޓުވުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެދިވަޑައިގެންފިއެވެ.
އޭނާ މިހެން އެދިވަޑައިގަތީ ރައްޔިތުންގެ މަޖިލީހުގެ މިއަދުގެ ޖަލްސާގެ ތެރެއިން އިނގުރައިދޫ ދާއިރާގެ މެންބަރު އިބްރާހިމް ފަލާޙް ދެއްކެވި ވާހަކައަކާ ގުޅިގެން ަމަޖިލީހުގެ ބައެއް މެންބަރުން އެމްޑީޕީ މެންބަރުންނަށް ނިސްބަތްކޮށް ލާދީނީއޭ ބުނުމުންނެވެ.
ރައްޔިތުންގެ މަޖިލީހުގައި މިއަދު ކުރިއަށް ދިޔައީ މިސްކިތްތަކަށް ގެއްލުން ދިނުމަކީ ޓެރަރިޒަމްގެ އަމަލަކަށް ހެދުމަށް މެންބަރު ކުޑޫ ހުށަހެޅުއްވި މައްސަލައިގެ ބަހުސެވެ.
އެއަށް ބަހުސް ކުރައްވަމުން ފަލާޙް ވަނީ އެމްޑީޕީން އެ މައްސަލަ ހުށަހެޅި ނަމަވެސް، މައްސަލާގައި ބަހުސް ކުރަން މަޖިލީހަށް ހާޒިރުވި މެމްބަރުން މަދުކަން ފާހަގަކުރައްވާފައެވެ. އެއާއެކު އެމްޑީޕީ މެމްބަރުން ނުރުހުން ފާޅުކިރެއްވުމިން މަޖިލީހުގައި ތިއްބެވި ބައެއް ޕީއެންސީ މެންބަރުން ވަނީ އެމްޑީޕީ އަށް ނިސްބަތްކުރައްވައި ލާދީނީއޭ ވިދާޅުވެފައެވެ.
އެކަމާގުޅިގެން މެމްބަރުން ކުޑޫ ވަނީ، އެކަކު އަނެކަކަށް ލާދީނީ އޭ ގޮވުން ހުއްޓުވަން ރިޔާސަތަށް ދަންނަވާފައެވެ.
އެކަކު އަނެކަކަށް މި ގޮވާ ލާދީނީ، މއީ އަނގަ ހައްދު ޖަހަންޖެހޭވަރުގެ، ދީނުން ބޭރުވާ ވަރުގެ ވާހަކަ އެކަކު އަނެކަކާ ދިމާއަށް ގޮވުން ހުއްޓުވަން.
މެންބަރު ކުޑޫ
މެންބަރު ކުޑޫ ވަނީ އެފަދައިން އެ މެންބަރުންނަށް ކިޔުމުގެ ސަބަބުން ލިބިދާނެ ހެއްލުމެއްގެ ޒިންމާ އެ ކިޔުއްވާ މެމްބަރުން ނަންގަވަން ޖެހޭ ކަމަށް ވިދާޅުވެފައެވެ.
ކުޑޫގެ ވާހަކަ އާއި ގުޅިގެން ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުالله ވަނީ އެކަން ކުރައްވަން ބޭނުންވާނަމަ، ”ލާދީނީ“ ކިޔުން މަނާ ކުރާ ބިލެއް މަޖިލީހަށް ހުށަހެޅުއްވަން އެދިވަޑައިގެންފައެވެ.
އަދި އެފަދަ ބިލެއް ހުށަހެޅި އެކަން މަނާ ނުވާހާ ހިނދަކު ލާދީނީ ކިޔުން ނުހުއްޓުވޭނެ ކަމަށްވެސް އަދުރޭ ވިދާޅުވުއެވެ.
Advertisement
This content is created and paid for by advertisers and does not involve Voice Journalists
