ކުޅުދުއްފުށި ސިޓީގައި ތަރައްޤީކުރާ އާ ފުޓުބޯޅަ ދަނޑުގެ މަސައްކަތްތަކުގެ ތެރެއިން، ދަނޑުގެ ސަބް ބޭސް ތައްޔާރުކުރުމުގެ މުހިންމު މަރުހަލާއެއް މިހާރު ފަށައިގެން ކުރިއަށްދާކަން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބުނެފިއެވެ.

މި މަޝްރޫޢުގެ އެންމެ ފަހުގެ މަޢުލޫމާތު ހިއްސާކުރަމުން އާރްޑީސީން ބުނެފައިވަނީ، ދަނޑުގެ ސަބް ބޭސް ތައްޔާރުކުރުމަށްޓަކައި ކުރަންޖެހޭ މަސައްކަތްތަކުގެ ތެރެއިން މިހާރު ކުރިއަށްދަނީ ގަޓަރ ލައިންތައް ބެހެއްޓުމުގެ މަސައްކަތް ކަމަށެވެ. މިއީ ދަނޑުގައި ފެންބޮޑުވިޔަނުދީ ފެން ހިންދުމަށްޓަކައި އެޅޭ މުހިންމު ނިޒާމެކެވެ.

ސަރުކާރުން ކުޅިވަރުގެ އިންފްރާސްޓްރަކްޗަރ ވަރުގަދަކުރުމަށް ކުރަމުންދާ މަސައްކަތުގެ ދަށުން ކުރިއަށްދާ މި މަޝްރޫޢަކީ ކުޅުދުއްފުށީގެ ޒުވާނުންނާއި ކުޅިވަރަށް ލޯބިކުރާ ފަރާތްތަކުން ނުހަނު އިންތިޒާރު ކުރަމުންދާ މަޝްރޫޢެކެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަމާޒު ހިފާފައިވަނީ ރަށްރަށުގެ ކުޅިވަރު ވަސީލަތްތައް ޒަމާނީ ފެންވަރަށް ތަރައްޤީކޮށް، ކުޅުންތެރިންނަށް ބޭނުންވާ ފުރުޞަތުތައް ފަހިކޮށްދިނުމަށެވެ.

އާރްޑީސީން ބުނީ އެކުންފުނިން މަސައްކަތް ކުރަމުންދަނީ ކަނޑައެޅިފައިވާ ތާވަލާ އެއްގޮތަށް ދަނޑުގެ ސަބް ބޭސް މަސައްކަތްތައް ނިންމާލުމަށެވެ. މި މަސައްކަތް ނިމުމުން ދަނޑުގައި ޓާފް އެޅުމުގެ މަސައްކަތް ފެށިގެންދާނެއެވެ.

މި މަޝްރޫޢު ނިމުމުން، ކުޅުދުއްފުށި ސިޓީގައި ބައިނަލްއަޤުވާމީ ފެންވަރުގެ މުބާރާތްތައް ބޭއްވުމުގެ ފުރުޞަތު ފަހިވެ، ސަރަޙައްދީ ފެންވަރުގައި ކުޅިވަރު ކުރިއެރުވުމަށް ބޮޑު ބާރަކަށް ވެގެންދާނެ ކަމަށް ބެލެވެއެވެ.