އަޅުގަނޑުމެން ޙަޔާތުގެ ދުވަސްތަކުގެ ތެރެއިން މި ވޭތުވަމުންދަނީ އެންމެ މާތް އަދި އެންމެ ބަރަކާތްތެރި އެއް މައްސަރުގެ ދުވަސްތަކެވެ. މި މައްސަރަކީ އަޅުކަމުގެ މައްސަރެވެ. ފާފަފުއްސެވުމާއި މާތް الله ގެ ރުއްސެވުމަށް އެދި ދެންނެވުމުގެ މައްސަރެވެ. 

މި މައްސަރަކީ ދުޢާގެ މައްސަރެވެ. ފާއިތުވި ދުވަސްތަކުގައި އެނގިގެންނާއި ނޭނގިނަމަވެސް ކުރެވިފައިވާ ފާފަތައް ފުއްސެވުމަށްއެދި އަހަރެމެންގެ ވެރި ރައްބުގެ އަރިހުގައި ދަންނަވައި، ފާފަތައް ތަކުރާރު ނުކުރެވުމަށާއި، ހެޔޮ ޢަމަލުކުރުންމަތީ ދެމި ތިބުމުގެ ހެޔޮ ތަޢުފީގު ދެއްވުންއެދި މާތް الله ގެ ހަޟުރަތުގައި ދަންނަވަންވީ މައްސަރެވެ.

އެހެންކަމުން، މާތް الله ގެ ހަޟުރަތުގައި ކަންކަމަށް ދެންނެވުމުގައި ޢަމަލު ކުރަންވީ ގޮތް، ނުވަތަ ދުޢާ ކުރުގެ އަދަބުތައް އެނގުމަކީ މުހިންމު ކަމެކެވެ. އެ އަދަބުތައް އެނގި، އެއާ އެއްގޮތަށް ދުޢާ ކުރުމަކީ މާތް الله ގެ އިރާދަފުޅުން ދުޢާ އިޖާބަކުރައްވާނޭ ސަބަބެއް ކަމުގައި ޢިލްމުވެރިން ވިދާޅުވެއެވެ. 

އެގޮތުން، ޖަމިއްޔަތުލް ސަލަފުން މި އަހަރު ރަމަޟާން މަހާއި ގުޅިގެން ކުރިއަށް ގެންދާ ”ދުޢާ“ ސީރީޒް ގައި ދުޢާ ކުރުމުގެ އަދަބުތައް އޮޅުންފިލުވައި ދެއްވަމުން، ޝެއިޚް އަހުމަދު ސަމީރު ވަނީ، ޔޫނުސްގެފާނު ބޮޑު މަހުގެ ބަނޑުގައި އޮންނަވައިގެން ކުރެއްވި ދުޢާގެ މައްޗަށް އަލި އަޅުވާ ލައްވާފައެވެ. 

އެ ދުޢާ އަކީ، 

لَّا إِلَٰهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ

މާނައީ: އިބަރަސްކަލާނގެ މެނުވީ، އިލާހަކު ނެތެވެ. އިބަރަސްކަލާނގެ ހުސްޠާހިރުވަންތަކަމާއެވެ! ހަމަކަށަވަރުން، އަނިޔާވެރިންގެ ތެރެއިން މި އަޅާވީމެވެ.

”މި ދުޢާ މި ހުރި އަސާސްތައް މިއީ އަޅުގަނޑުމެންގެ ދުޢާގައި ހުންނަންޖެހޭ ކަންކަން. އެންމެ ފުރަތަމަ ކަމަކީ މާތް الله ގެ އެއްކައުވަންތަކަން ޤަބޫލުކޮށް، ތައުޙީދުގެ އަހުލުވެރިއެއް ކަމުގައިވުން، އަނެއް ކަމަކީ އެކަލާނގެ ހުސްޠާހިރުވަންތަ ކުރުން. އެކަލާނގެއީ އެންމެހާ އުނި ކަމަކުން ހުސްޠާހިރުވަންތަ އިލާހުކަން. އަނެއްކަމަކީ އެ މީހެއްގެ ކުށަށް އިއުތިރާފް ވުން.“ 

މިއާއެކު ޝެއިޚް ވަނީ ދުޢާ ކުރުމުގެ ބައެއް އަދަބުތަކަށް ކުރުގޮތަކަށް އަލިއަޅުވާލައްވާފައެވެ. އެއީ؛ 

މާތް الله އަށް އިޚްލާސްތެރިވުންޙަމްދުން ފެށުން އަދި ޞަލަވާތުން ނިންމުން.ދުޢާ ކުރާއިރު ޔަގީން ކަމާއެކު ދުޢާ ކުރުން.ދުޢާ ދަންނަވާއިރު އާދޭސްކޮށް، ތަކުރާރުކޮށް ދެންނެވުންމީހާގެ ހިތް ހާޟިރުކޮށް އިޚްލާސްތެރިކަމާއެކު ދުޢާ ދެންނެވުންމާ އަޑުގަދަކޮށް ދުޢާ ނުކުރުން. އަދި އެއްވެސް ވަރަކަށް، މީހާގެ ނަފްސަށްވެސް ނީވޭ ވަރަށް ނުކުރުން. އޭގެ ބަދަލުގައި މެދު މިނަކަށް އަޑު ބެހެެއްޓުން.ދުޢާ ކުރުމުގެ އިބާރާތްތައް ރީތި ކުރުމުގައި، އެ މީހެއްގެ އަމިއްލަ ނަފްސަށް ތަކުލީފަކަށް ވާ ވަރަށް އެކަން ނުކުރުން.ދުޢާ ކުރުމުގައި މާ ބޮޑަށް ތަފްސީލުތަކަށް ނުދިޔުންޤިބުލައަށް ކުރިމަތިލުންދެއަތް އުފުލުންވުޟޫ ކުރުންމާތްالله ގެ އިސްމުފުޅުތަކުން ދުޢާ ކުރުން

އިއްޔެގެ ދަރުހުގައި ޝެއިޚް ސަމީރުވަނީ ދުޢާ އިޖާބަ ނުކުރެވޭ ސަބަބުތަކާއި، ދުޢާ އިޖާބަ ކުރެއްވޭ ޙާލަތްތަކުގެ މައްޗަށްވެސް އަލިއަޅުވާލައްވާފައެވެ. 

އެ ދަރުހުގައި މައިގަނޑުކޮށް އަލިއަޅުވާ ލައްވާފައި ވަނީ ދުޢާ ކުރުމުގެ އަދަބުތަކުގެ ތެރެއިން، ދުޢާ ކުރާއިރު މާ ބޮޑަށް ތަފްސީލުކޮށް ދުޢާ ކުރުމުގެ މައްޗަށެވެ. 

އެގޮތުން ވިދާޅުވީ، ދުޢާ ކުރުމުގައި މާ ބޮޑަށް ތަފްސީލް ތަކަށް ދިޔުމަކީ ރަސޫލާ ﷺ ސުންނަތުން ސާބިތުވާ ކަމެއް ނޫން ކަމަށެވެ. ޝެއިޚް ވަނީ ބައެެއް ޞަޙާބީ ބޭކަލުންގެ އެ ބޭކަލުންގެ ދަރިކަލުން ސުވަރުގެ ދެއްވުން އެދި ދުޢާ ކުރެއްވި އިރު މާ ތަފްސީލުކޮށް ސުވަރުގެއިން ބޭނުންވާ ކަންކަމުގެ ވާހަކަ ހިމަނުއްވައި ދުޢާ ކުރެއްވުމުން އެފަދައިން ކަން ނުކުރެއްވުމަށް ރަސޫލާ ﷺ އަންގަވާފައިވާ ކަމަށް ވިދާޅުވެ ނަޞޭޙަތްތެރިވެވަޑައިގެންނެވިކަމަށް ވިދާޅުވެފައެވެ. 

އަދި ދުޢާ ކުރަންވީ ނަރަކައިން މިންޖު ކުރައްވައި ސުވަރުގެ ދެއްވުން އެދި ކަމަށްވެސް ޝެއިޚް ވިދާޅުވިއެވެ.