މެދުފަންތީގެ ޓޫރިޒަމަށް ސަރުކާރުން އުފެއްދި މޯލްޑިވްސް އިންޓިގްރޭޓެޑް ޓޫރިޒަމް ޑެވެލޮޕްމަންޓް ކޯޕަރޭޝަން (އެމްއައިޓީޑީސީ) އުވާލުމުގެ މަސައްކަތް ކުރާނޭ ބަޔަކު ހޯދުމުގެ މަސައްކަތް ފަށައިފިއެވެ.

ފިނޭންސް މިނިސްޓްރީން ވަނީ އެމްއައިޓީޑީސީ އުވާލުމަށްޓަކައި އެ މަސައްކަތް ކޮށްދޭނޭ ފަރާތެއް ހޯދުމަށް އާއްމުކޮށް އިއުލާނުކޮށްފައެވެ. އެކަން ކޮށްދިނުމަށް އެދޭ ފަރާތްތަކުން މިއަދުގެ 13:30 ހަށް ޕްރޮޕޯސަލް ހުށަހަޅަންޖެހެއެވެ. 

އެމްއައިޓީޑީސީ އުވާލުމުގެ މަރުހަލާ ކުރިއަށްދާތީވެ، ސިވިލްކޯޓުން ވަނީ މިހިނދަށް އެކުންފުންޏާ ގުޅޭ ބައެއް މައްސަލަތައް ކުރިއަށްގެންދިއުންވެސް މަޑުޖައްސާލާފައެވެ. މިހާލަތުގައި ދައުވާކުރާ ފަރާތަށް ލިބެންޖެހޭ ފައިސާ ފައިސާ ހޯދުމުގެ ކަންކަން ކުރިއަށް ގެންދަން ހުށަހަޅަންޖެހޭނީ ދައުވާލިބޭ ކުންފުނި އުވާލުމުގެ މަސައްކަތްކުރުމަށް އައްޔަނުކޮށްފައިވާ ލިކުއިޑޭޓަރެވެ. އެހެންކަމުން ސިވިލްކޯޓުގެ ޤަޟިއްޔާގެ ހުކުމެއް ތަންފީޒުކުރުމުގެ މައްސަލަ މިހިނދަށް ކުރިއަށް ނުގެންދެވޭނޭކަމަށް އެ ކޯޓުން ވަނީ މިދިޔަ ޑިސެމްބަރުމަހު ކަނޑައަޅާފައެވެ.

އެމްއައިޓީޑީސީއަކީ މެދުފަންތީގެ ޓޫރިޒަމް ފުޅާކޮށް ތަރައްޤީކޮށް ޕްރޮމޯޓް ކުރުމަށް ކުރީގެ ރައީސް ޢަބްދުﷲ ޔާމީނުގެ ވެރިކަމުގައި އުފެއްދި ކުންފުންޏެކެވެ. އެމްޓީޑީސީގެ އެންމެ އުއްމީދީ މަޝްރޫޢުއެއްގެ ގޮތުގައި ކުރިއަށްގެންދަން ނިންމާފައި އޮތީ ލ.ބަރެސްދޫ ޕްރޮޖެކްޓެވެ. ނަމަވެސް އެތަން ތަރައްޤީކުރަން ބިންތައް ދޫކޮށްގެން ފައިސާ ނެގި ނަމަވެސް އެތަނުގެ މަސައްކަތް އެދެވޭ ގޮތަށް ކުރިއަށް ގޮސްފައެއް ނުވެއެވެ.

އެމްއައިޓީޑީސީ އުފެދުނުފަހުން 2023 ވަނަ އަހަރުގެ ނިޔަލަށް ކުންފުނީގެ ކުރު މުއްދަތުގެ ދަރަނި އެކަންޏަށްބެލި ނަމަވެސް 137.8 މިލިއަން ރުފިޔާ އެބައޮތެވެ. އޮޑިޓަރ ޖެނެރަލް ބަރެސްދޫއާ ގުޅޭގޮތުން ނެރުއްވި ރިޕޯޓްގައި ބުނެފައިވަނީ ބަސްރެސްދޫ، އަދި ކާށިދޫގައި ހެދުމަށް ނިންމާފައިވާ ޓޫރިސްޓް ވިލެޖް ޕްރޮޖެކްޓް އަދި ކ.އަތޮޅެ 10 ފަޅެއް ހިއްކާ ތަރައްޤީކުރުމަށް ކުރިއަށްގެންދިޔަ ޕްރޮޖެކްޓް ފާމަށް 52.3 ހަރަދުކޮށްފައިވީނަމަވެސް އެއްވެސް ޕްރޮޖެކްޓެއްގެ މަސައްކަތް ނިމިފައި ނުވާކަމަށެވެ.

އެމްއައިޓީޑީސީ އުވާލުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީއަށް އެންގުމަށް ރައްޔިތުންގެ މަޖިލީހުން ވަނީ މިދިޔަ އަހަރުގެ ޖުލއިމަހުގެ ތެރޭގައި ފާސްކޮށްފައެވެ. އަދި ހަމަ އެހެންމެ ވަޒީރުންގެ މަޖިލީހުން އެއަހަރުގެ ސެޕްޓެމްބަރުމަހުގެ 1 ވަނަ ދުވަހު ބޭއްވެވި ޖަލްސާގައި ވަނީ އެމްއައިޓީޑީސީ އުވާލުމަށް ނިންމާފައެވެ.

ބަރެސްދޫއާ ގުޅޭގޮތުން އެންމެ ފާހަގަކޮށްލެވޭ އެއް ވާހަކައަކީ ރިސޯޓުތަކުން ސީއެސްއާރުގެ ގޮތުގައި ޓުއަރިޒަމް މިނިސްޓްރީއަށް ދިން ފައިސާ ޕީޕީއެމްގެ ދެބުރި އޮފީހެއް އެޅުމަށް ބޭނުންކުރި ވާހަކައެވެ. މިކަން އޮޑިޓަރ ޖެނެރަލް ނެރުއްވި އެމްއައިޓީޑީސީގެ އޮޑިޓް ރިޕޯޓްގައިވެސް ވަނީ ބަޔާންކޮށްފައެވެ.