މެދުއިރުމަތީގެ މައްސަލައާ ގުޅިގެން ކާބޯތަކެއްޗާއި އަސާސީ ބާވަތްތައް ލިބުން ދަތިވޭތޯ ބަލައި މޮނިޓަރ ކުރަމުން ގެންދާކަމަށް އިކޮނޮމިކް މިނިސްޓްރީން ބުނެފިއެވެ.

އިކޮނޮމިކް މިނިސްނޓްރީން މިރޭ ނެރުނު ބަޔާނެއްގައި ބުނެފައިވަނީ، މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން އިކޮނޮމިކް މިނިސްޓްރީން ދައުލަތުގެ ކަމާ ގުޅުންހުރި ހުރިހާ ފަރާތްތަކާއެކު ކުރިމަތިވެދާނޭ އަސަރުތައް ވަރަށް ރަނގަޅަށް މޮމިޓަރ ކުރަމުންގެންދާކަމަށެވެ. އެގޮތުން ބައިނަލްއަޤްވާމީ މުދާ އުފުމުގެ ނިޒާމަށް އަތުވެދާނޭ ލޮޅުންތައް  ދައުލަތުގެ ކަމާ ގުޅޭ އިދާރާތަކާއި ގުޅިގެން މަސައްކަތް ކުރަމުންގެންދާކަމަށް އިކޮނޮމިކް މިނިސްޓްރީން ބުންޏެވެ.

އަދި ރާއްޖެއަށް އާއްމުކޮށް މުދާ އެތެރެކުރާ މާކެޓްތަކާއި، ރުޓުތަކަށް ދިމާވެދާނެ ދަތިތައް ދެނެގަނެ، އެކަމުން އަރައިގަތުމަށްޓަކައި ބޭނުންވާނޭ އެހެނިގެން އިތުރު މާކެޓްތައް ހޯދުމުގެ މަސައްކަތް ކުރަމުންދާ ކަމަށްވެސް ބުންޏެވެ.

މިނިސްޓްރީން ބުނީ މި ދަނޑިވަޅުގައި ސަރުކާރުގެ އެންމެ އިސް އަމާޒަކީ ރައްޔިތުންނަށް ބޭނުންވާ ކާބޯތަކެއްޗާއި އަސާސީ މުދަލުގެ ރައްކާތެރިކަން ކަށަވަރުކޮށްދިނުން ކަމަށެވެ. މިގޮތުން ރާއްޖެއަށް ބޭނުންވާ މުހިންމު ބާވަތްތަކުގެ ސްޓޮކްތައް ހުސްނުވެ ލިބޭނޭ އިންތިޒާމް ހަމަޖެއްސުމާއި. އިމްޕޯޓް ކުރުމުގައި ހުރި ގޮންޖެހުންތަކަށް ހައްލު ހޯދުމަށް ސަރުކާރުގެ މުއައްޒަސާތަކާއި، އަމިއްލަ ވިޔަފާރިތަކާ ގުޅިގެން އަލަންޖެހޭ އެންމެހައި ފިޔަވަޅުތައް އަޅާނޭކަމުގެ ޔަގީންކަން ރައްޔިތުންނަށް ދޭކަމަށް މިނިސްޓްރީން ބުންޏެވެ.

ސަރުކާރުން އަބަދުވެސް މަސައްކަތް ކުރަނީ ރާއްޖޭގެ އިގްތިސާދީ ހަމަޖެހުން އިސްކޮށް، ރައްޔިތުންނަށް ބޭނުންވާ އަސާސީ މުދާ ފަސޭހަކަމާއެކު ލިބޭނޭމަގު ފަހިކޮށްދިނުން ކަމަށްވެސް އިކޮނޮމިކް މިނިސްޓްރީގެ ބަޔާނުގައި ބުންޏެވެ.