މިދިޔަ ފެބުރުއަރީމަހުގެ 26 ވަނަ ދުވަހުގެ ނިޔަލަށް ދައުލަތަށް ލިބުނު އާމްދަނީއާ، ކުރެވުނު ހަރަދުތަކަށް ބަލާއިރު 1.9 ބިލިއަން ރުފިޔާ ބަޖެޓް އަރަނީގެ ގޮތުގައި ރެކޯޑް ކުރެވިފައިވާކަމަށް ފިނޭންސް މިނިސްޓްރީން ބުނެފިއެވެ.

ފިނޭންސުން ނެރެފައިވާ ދައުލަތުގެ ހަރަދުބަރަދާ ގުޅޭ ރިޕޯޓްގައި ބުނެފައިވަނީ، އަހަރުގެ މިހާހިސާބަށް އާއިރު، ދައުލަތުގެ މާލީ ހާލަތު ދައްކަނީ ވަރަށް ރަނގަޅަށްކަމަށެވެ. އެގޮތުން ފެބުރުއަރީމަހުގެ 26 ވަނަ ދުވަހުގެ ނިޔަލަށް ދައުލަތަށް އާމްދަނީއާއި ހިލޭ އެހީގެ ގޮތުގައި ޖުމްލަ 7.8 ބިލިއަން ރުފިޔާ ލިބިފައިވާއިރު، ޖުމްލަ ހަރަދަކީ 5.9 ބިލިއަން ރުފިޔާއެވެ. އެހެންކަމުން، މި މުއްދަތުގެ ނިޔަލަށް ދައުލަތުގެ ބަޖެޓުން 1.9 ބިލިއަން ރުފިޔާގެ ސާޕްލަސްގެ ގޮތުގައި ރެކޯޑްކުރެވިފައިވާކަމަށް ފިނޭންސުން ބުންޏެވެ.

ފިނޭންސުން ނެރުނު ރިޕޯޓްގައި ވަނީ މިދިޔަ އަހަރާ އަޅާބަލާއިރު މި އަހަރުގެ މި މުއްދަތުގެ ތެރޭގައި ދައުލަތުގެ އާމްދަނީއަށް ވަރަށްބޮޑު ކުރިއެރުމެއް ލިބިފައިވާކަމަށެވެ. އެގޮތުން ޖުމްލަ އާމްދަނީގެ ގޮތުގައި 7.8 ބިލިއަން ރުފިޔާ ލިބުނުއިރު މިއީ މިދިޔަ އަހަރުގެ މި މުއްދަތާ އަޅާބަލާއިރު 29.3 އިންސައްތައިގެ ކުރިއެރުމެކެވެ. ދައުލަތުގެ އާމްދަނީގެ ގޮތުގައި ލިބުނު އަދަދުގެ ތެރެއިން 83 އިންސައްތައަކީ ޓެކުހުގެ ގޮތުގައި ލިބުނު އާމްދަނީއެވެ.

އަހަރުގެ މިހާތަނަށް އެންމެ ބޮޑު ކުރިއެރުމެއް ލިބިފައިވަނީ ފަތުރުވެރިކަމުގެ ދާއިރާގެ މުދަލާއި ޚިދުމަތުގެ ޓެކްސް (ޓީ.ޖީ.އެސް.ޓީ) އިންނެވެ. އެގޮތުން ޓީ.ޖީ.އެސް.ޓީގެ ގޮތުގައި 2.3 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރަށްވުރެ 39.4 އިންސައްތަ އިތުރު އަދަދެކެވެ.

ހަރަދުތަކަށް ބަލާއިރު، މިދިޔަ އަހަރާ އަޅާބަލާއިރު ޖުމްލަ ޚަރަދުތައް ވަނީ އެއްވަރެއްގައި ހިފެހެއްޓިފައެވެ. ނަމަވެސް، މުވައްޒަފުންގެ މުސާރައާއި އިނާޔަތްތަކަށް ކުރާ ހަރަދު ވަނީ 9.6 އިންސައްތަ އިތުރުވެފައެވެ. މިއަހަރުގެ މި މުއްދަތުގައި މުސާރައާއި ޕެންޝަނަށް 2.64 ބިލިއަން ރުފިޔާ ހަރަދުކޮށްފައިވާއިރު މިއީ ޕޭ ހާމަނައިޒޭޝަން ސިޔާސަތުގެ ސަބަބުން އައިސްފައިވާ ބަދަލެއްކަމަށް ފިނޭންސުން ވަނީ ފާހަގަކޮށްފައެވެ.

ދައުލަތުގެ މާލީ ހާލަތު ވަރުގަދަވުމުގެ ސަބަބުން، މިދިޔަ އަހަރުގެ މި މުއްދަތުގައި 98.2 މިލިއަން ރުފިޔާގައި ހުރި ސާޕްލަސް، މިއަހަރު ވަނީ 1.9 ބިލިއަން ރުފިޔާއަށް އުފުލިފައެވެ. މީގެ އިތުރުން، ސޮވެރިން ޑިވެލޮޕްމަންޓް ފަންޑަށް (އެސް.ޑީ.އެފް) ޖަމާކުރި އަދަދުވެސް ވަނީ 2.5 އިންސައްތަ އިތުރުވެ، 287.1 މިލިއަން ރުފިޔާއަށް އަރާފައެވެ .ބޭރު ފައިސާގެ އާމްދަނީއަށް ބަލާއިރު، މި މުއްދަތުގައި 222.8 މިލިއަން އެމެރިކާ ޑޮލަރު ދައުލަތަށް ލިބިފައިވާކަމަށް ފިނޭންސުން ވަނީ ފާހަގަކޮށްފައެވެ.

ފިނޭންސުން ބުނީ މިފަހަރު ހިސާބުތައް ނެރުން ލަސްވެފައިވަނީ، ޝަރުޢީ ދާއިރާއަށް ދެވޭ "ސެކްޓޯރަލް ގްރާންޓް" ނިޒާމު ތަޢާރަފުކުރުމާއި، ޒަކާތު ފަންޑަށް ޚާއްޞަ ވަކި ލެޖަރ އެކައުންޓެއް ގާއިމުކުރުން ފަދަ ކަންކަމުގެ ސަބަބުންކަމަށެވެ. އަދި ހަމަ އެހެންމެ މި އިޞްލާޙުތަކާއެކު، ދައުލަތުގެ އެކައުންޓިންގ ސިސްޓަމް އަލުން ތަރުތީބުކުރުމާއި، ބައެއް މާލީ ހިސާބުތައް ރިކައުންސިލްކުރުމުގެ މަސައްކަތްތައް ކުރިއަށް ގެންގޮސްފައިވުމަކީވެސް މި ރިޕޯޓްނެރުން ލަސްވުމުގެ ސަބަބުތައްކަމަށް ފިނޭންސުން ވަނީ ފާހަގަކޮށްފައެވެ.