ނެޝަނަލް ހެލްތު ލެބޯޓަރީ އިމާރާތް ކުރުމަށްޓަކައި އަންނަ ޖުލައި މަސްތެރޭގައި ބީލަމަކަށް ހުޅުވާލާނެ ކަމަށް ހެލްތު މިނިސްޓަރު އަބްދުﷲ ނާޘިމް އިބްރާހިމް ވިދާޅުވެއްޖެ އެވެ.

ރައީސް އޮފީހުގައި ބޭއްވި ނޫސްވެރީންގެ ބައްދަލްވުމުގައި މިނިސްޓަރު ވިދާޅުވީ ނެޝަނަލް ހެލްތު ލެބޯޓަރީ ޑިޒައިންކޮށް ފީސިބިލިޓީ ސްޓަޑީ ހެދުމާއި ކޮންސަލްޓަންސީގެ ހިދުމަތް ހޯދުމަށް ބައިނަލްއަގްވާމީ ވާދަވެރި ބީލަމަކަށް ހުޅުވާލައިގެން ޓެންޑާކޮށް ހޮވިފައިވާ ޖަރުމަނުގެ ކުންފުނި ޖައިޓެކް އާއިއެކު އެގްރީމަންޓުގައި ސޮއިކޮށްފައިވާ ކަމަށެވެ.

މި މަސައްކަތް ކުރުމަށް 1.2 މިލިއަން ޑޮލަރަށް އެ ކުންފުންޏަށް ހަވާލުކޮށްފައިވާއިރު، މަސައްކަތުގެ ބޮޑުބައި ނިމިފައި ކަމަށް މިނިސްޓަރު ވަނީ ވިދާޅުވެފަ އެވެ.

ނެޝަނަލް ހެލްތު ލެބޯޓަރީގެ މައިގަނޑު މަސައްކަތްތަކުގެ ތެރޭގައި ކާބޯތަކެއްޗާއި ބޭހުގެ ރައްކާތެރިކަމާއި ފެންވަރު ދެނެގަތުމަށް ކުރަންޖެހޭ ކެމިކަލް އަދި މައިކްރޯބައޮލޮޖިކަލް ތަހުލީލުތައް ކުރުމާއި، ލެބޯޓަރީގައި ކުރާ ޓެސްޓްތަކަކީ ބައިނަލް އަގްވާމީ ފެންވަރުގެ ޓެސްޓްތަކެއް ކަމުގައި ހެދުމަށް ކުރަންޖެހޭ މަސައްކަތްތައް ކުރުމާއި، ރާއްޖޭގެ މަސްވެރިކަމާއި، ޓޫރިޒަމް އިންޑަސްޓްރީ އަދި މިނޫންވެސް އެކި މުއައްސަސާތަކުގެ ބޭނުން ތަކަށް ކުރަންޖެހޭ ތަހްލީލުތައް ކުރުން ހިމެނެ އެވެ. 

މިނިސްޓަރު ވިދާޅުވީ އެމްއެފްޑީއޭއަށް މި އަހަރާއި އަންނަ އަހަރު ގެނެވޭ އެންމެ ބޮޑު ކުރިއެރުމަކީ ގައުމީ ސިއްހީ ލެބޯޓަރީ ގާއިމްކުރުމުގެ މަސައްކަތް ކަމަށެވެ. ސަބަބަކީ މިހާރު ގައުމީ ލެބޯޓަރީ ހިންގަނީ ހެލްތު މިނިސްޓްރީ ހިނގަމުންދާ އިމާރާތުގައި ކަމަށާއި މި އިމާރާތަކީ މިފަދަ ތަނެއް ހިންގުމަށް ޖާގައިގެ ގޮތުންނާއި އެހެނިހެން ގޮތްތަކުންވެސް އެންމެ އެކަށީގެންވާ އިމާރާތެއް ނޫން ކަމަށެވެ. 

އަލަށް އިމާރާތް ކުރުމަށް ހަމަޖެހިފައިވާ ނެޝަނަލް ހެލްތު ލެބޯޓަރީއަކީ ނުވަ ފަންގިފިލާގެ އިމާރާތެކެވެ. ޖާގަ ތަނަވަސް މި ލެބޯޓަރީން ދޭނެ ހިދުމަތްތަކުގެ ތެރޭގައި ވައިރޮލޮޖީ ރިސްކު ލެވެލް 2 އަދި 3 ގެ ވައިރަސްތައް ތަހުލީލުކުރުމާއި، ބެކްޓޮރޮލޮޖީގެ ދާއިރާއިން ބެކްޓީރީއާއި ގުޅުންހުރި ތަހުލީލުތައް ހިމެނެ އެވެ. މި ލެބޯޓަރީއާއެކު ކާބޯތަކެއްޗާއި ބޭސް ތަހުލީލު ކުރުމުގެ މަސައްކަތް އިތުރަށް ފުޅާވެންދާނެ އެވެ.