ދިވެހިރާއްޖޭގެ ޤައުމީ ޔުނިވަރސިޓީގެ ޚިދުމަތްތައް އަތޮޅުތަކަށް ފުޅާކުރުމުގެ ގޮތުން ބ. އޭދަފުށީގައި ޤާއިމުކުރާ އެމްއެންޔޫ ކެމްޕަހުގެ ބިންގާ މިއަދު އަޅައިފިއެވެ.

ޤައުމީ ޔުނިވަރސިޓީ ކެމްޕަހުގެ މި އިމާރާތުގެ ބިންގާ އެޅުމުގެ މަސައްކަތް ރަސްމީކޮށް ފައްޓަވައިދެއްވީ މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. ޢަލީ ހައިދަރު އަޙްމަދެވެ. މި ރަސްމިއްޔާތުގައި އޭދަފުށީ ދާއިރާގެ ރައްޔިތުންގެ މަޖިލީހުގެ މެންބަރު އަޙްމަދު ސަލީމާއި، އެމް.ޓީ.ސީ.ސީގެ މެނޭޖިންގ ޑިރެކްޓަރ އަޙްމަދު ސައުދީއާއި، ޤައުމީ ޔުނިވަރސިޓީގެ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމާއި، ބ. އޭދަފުށީ ކައުންސިލްގެ ރައީސް މުޙައްމަދު ފާތިޙް އަދި ސަރުކާރުގެ އެކި މުއައްސަސާތަކުގެ އިސް ބޭފުޅުން ބައިވެރިވެވަޑައިގެންނެވިއެވެ.

އޭދަފުށީގައި ގާއިމްކުރާ ޤައުމީ ޔުނިވަރސިޓީ ކެމްޕަހުގެ ބިންގާ އެޅުން..

ޤައުމީ ޔުނިވަރސިޓީން ބުނީ މި މަޝްރޫޢުގެ ދަށުން އޭދަފުށީގައި ބިނާކުރެވޭނީ ތަޢުލީމީ، އިދާރީ އަދި ދަރިވަރުން ތިބުމަށް ބޭނުންވާ އެކޮމޮޑޭޝަން ފެސިލިޓީތައް ހިމެނޭހެން މަލްޓި-ބްލޮކް ކެމްޕަހެއް ކަމަށެވެ. ޖުމްލަ 80.79 މިލިއަން ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫޢު ނިންމުމަށް ތާވަލުކުރެވިފައިވަނީ 720 ދުވަހުގެ ތެރޭގައެވެ.

ގާތްގަނޑަކަށް 3,500 މީހުންގެ އާބާދީއެއް އޮތް ބ. އަތޮޅުގެ ވެރިރަށް އޭދަފުށީގައި މި ކެމްޕަސް ޤާއިމުވުމަކީ އެ އަތޮޅުގެ ދަރިވަރުންނަށް އަމިއްލަ އަތޮޅުގައި ތިބެގެން މަތީ ތަޢުލީމު ޙާޞިލުކުރުމުގެ ފުރުޞަތު ފަހިވެ، ތަޢުލީމު ޙާޞިލުކުރުމަށް މާލެއަށް ނުވަތަ އެހެން ރަށަކަށް ހިޖުރަކުރުމަށް ކުރަންޖެހޭ ބޮޑެތި ޚަރަދުތަކަށް ލިބޭނެ ވަރަށް ބޮޑު ލުޔެއް ކަމަށް ޤައުމީ ޔުނިވަރސިޓީން ބުނެއެވެ.