މުޅި މުޖުތަމައުގެ ކުރިއެރުމާއި ތަރައްގީއަށްޓަކައި ނިންމާ ނިންމުންތަކުގައި އަންހެނުންގެ ޚިޔާލާއި ކަންބޮޑުވުންތައް ހިމެނުން ކަށަވަރުކުރަންޖެހޭ ކަމަށް މާލެ ސިޓީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާ ކެންޑިޑޭޓް އާޝިޔަތު އަލައިކާ އަދުނާނު ވިދާޅުވެއްޖެއެވެ.

ބައިނަލްއަޤުވާމީ އަންހެނުންގެ ދުވަހާ ގުޅިގެން އިއްޔެ ނެރުއްވި ބަޔާނެއްގައި އާޝިޔަތު ވިދާޅުވީ، އަންހެނުންނަކީ އާއިލާތަކުގެ މައިބަދަ ކަމަށާއި، އަންހެނުން ބާރުވެރިވުމަކީ މުޅި މުޖުތަމައުގެ މުސްތަޤުބަލާ ގުޅިފައިވާ ކަމެއް ކަމަށެވެ. އަދި އަންހެނުންގެ ދުވަހަކީ އަންހެނުންގެ ކަރާމާތް ރައްކާތެރިކޮށް، ހަމަހަމަ ފުރުޞަތުތަކެއް ހޯދައިދިނުމަށް އައު އަޒުމެއް ކަނޑައަޅަންވީ ދުވަސްކަން އޭނާ ފާހަގަކުރެއްވިއެވެ.

މި އަހަރުގެ އަންހެނުންގެ ދުވަހަށް އދ. އިން ކަނޑައަޅާފައިވާ "ޙައްޤުތައް، އިންސާފު، ޢަމަލު – ހުރިހާ އަންހެނުން އަދި އަންހެން ކުދިންނަށް" މި ޝިއާރަށް އަލިއަޅުއްވާލައްވަމުން އާޝިޔަތު ވިދާޅުވީ، މި ޝިއާރުގެ ބޭނުމަކީ އަންހެނުންގެ ޙައްޤުތަކަކީ ހަމައެކަނި ލިޔެފައި އޮންނަ ފޮޅުވަތްތަކަކަށްވުމުގެ ބަދަލުގައި، ޢަމަލީގޮތުން އިންސާފު ހޯދައިދިނުމަށް ފިޔަވަޅު އެޅުން ކަމަށެވެ.

"އަންހެނުންނަށް އާމްދަނީ ލިބޭނެ މަގުތައް ފަހިކޮށްދީ، މާލީ ގޮތުން އަމިއްލަ ފައިމައްޗަށް ތެދުވުމަށް އެހީތެރިވާންޖެހޭ. އެކަނިވެރި މައިންނާއި ދަތި ހާލުގައި އުޅޭ އާއިލާތަކަށް ބޭނުންވާ ރައްކާތެރިކަމާއި އެހީތެރިކަން ފޯރުކޮށްދިނުމަށް މުއައްސަސާތައް އެއްބާރުލައިގެން މަސައްކަތްކުރަންޖެހޭ،" އާޝިޔަތުގެ ބަޔާނުގައި ވިދާޅުވެފައިވެއެވެ.

މީގެ އިތުރުން، އަންހެނުންގެ ޞިއްޙަތާއި، ރައްކާތެރިކަމާއި، ޒަރޫރީ ޚިދުމަތްތައް ފަސޭހައިން ލިބޭނެ ގޮތްތައް ކަށަވަރުކޮށްދިނުމުގެ މުހިންމުކަން އޭނާ ފާހަގަކުރެއްވިއެވެ.

އާޝިޔަތު އިތުރަށް ވިދާޅުވީ، ލާމަރުކަޒީ ޤާނޫނަށް ގެނެސްފައިވާ އިސްލާހުތަކުގެ ސަބަބުން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ލިބޭ ބްލޮކް ގްރާންޓް %10 އަށް ބޮޑުވެގެން ދިއުމަކީ، އަންހެނުންގެ ކުރިއެރުމަށް ކުރާ މަސައްކަތްތަކަށް ލިބުނު ބޮޑު ކުރިއެރުމެއް ކަމަށެވެ. މި ބަދަލާއެކު އަންހެނުންގެ ތަރައްޤީއަށް ކުރެވޭ މަސައްކަތްތަކަށް އިތުރު ފުރިހަމަކަމެއް ލިބިގެންދާނެ ކަމަށް އޭނާ އުއްމީދު ކުރައްވައެވެ.

ބަޔާން ނިންމަވާލައްވަމުން އާޝިޔަތު ވަނީ ރާއްޖޭގެ އެންމެހާ އަންހެނުންނަށް ދުވަހުގެ ތަހުނިޔާ އަރިސްކުރައްވާފައެވެ.