މެދުއިރުމަތީގައި އުފެދިފައިވާ ނުތަނަވަސްކަމާއި އިރާން-އެމެރިކާގެ ހަނގުރާމައިގެ ބިރުވެރިކަމާ ގުޅިގެން، މިސްރުގެ އިގްތިސާދަށް ކުރިމަތިވެފައިވާ ގޮންޖެހުންތަކުން އަރައިގަތުމަށްޓަކައި އެ ގައުމުގެ ތެލުގެ އަގު ބޮޑުކޮށް، ސަރުކާރުގެ ޚަރަދުތައް ކުޑަކުރުމަށް މުހިންމު ފިޔަވަޅުތަކެއް އަޅަން ފަށައިފިއެވެ.

އެސޯސިއޭޓެޑް ޕްރެސް (އޭޕީ) އިން ރިޕޯޓްކޮށްފައިވާ ގޮތުގައި، މިސްރުގެ އާންމު ދަތުރުފަތުރުގެ ނިޒާމުގައި އެންމެ ގިނައިން ބޭނުންކުރާ ޑީސަލް ލިޓަރެއްގެ އަގު މިހާރު ވަނީ 17 އިންސައްތައަށްވުރެ ބޮޑުވެފައެވެ. މީގެ އިތުރުން 92 އޮކްޓޭންގެ ޕެޓްރޯލްގެ އަގު 15 އިންސައްތަ އުފުލިފައިވާއިރު، 95 އޮކްޓޭންގެ ޕެޓްރޯލްގެ އަގު ވަނީ 14 އިންސައްތަ ބޮޑުކޮށްފައެވެ.

މިސްރުގެ "އަލް އަހްރާމް" އޮންލައިނުން ރިޕޯޓްކޮށްފައިވާ ގޮތުގައި، ތެލުގެ އަގަށް ގެނައި ބަދަލާއެކު ސަރުކާރުގެ ޚަރަދުތައް ކުޑަކުރުމަށާއި ހަކަތަ އިސްރާފުކުރުން މަދުކުރުމަށް ސަރުކާރުން ވަނީ ހަރުކަށި ފިޔަވަޅުތަކެއް ފާސްކޮށްފައެވެ.

މީގެ ތެރޭގައި ސަރުކާރުގެ ރަސްމީ ދަތުރުތައް މަދުކުރުމާއި، އުޅަނދުފަހަރުގައި ބޭނުންކުރާ ހަކަތަ ގުދުރަތީ ގޭހަށް ބަދަލުކުރުމުގެ މަސައްކަތް އަވަސްކުރުން ހިމެނެއެވެ.

ޢަރަބި ދުނިޔޭގެ އެންމެ އާބާދީ ބޮޑު ގައުމު ކަމަށްވާ މިސްރަކީ ބޭރުން އެތެރެކުރާ ތެލަށް ބަރޯސާވާ ގައުމެކެވެ. މެދުއިރުމަތީގައި ހިނގަމުންދާ ހަމަނުޖެހުންތަކުގެ ސަބަބުން އެ ގައުމުގެ ފައިސާގެ އަގުވެސް ވަނީ ރެކޯޑް މިންވަރަކަށް ދަށަށް ގޮސްފައެވެ. އެގޮތުން މިދިޔަ ހޯމަ ދުވަހު އެމެރިކާ ޑޮލަރަކަށް ޖެހޭ މިސްރު ފައުންޑުގެ ރޭޓް ވަނީ 52 އަށްވުރެ މައްޗަށް އަރާފައެވެ.

މި ނިންމުންތަކަކީ ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކާއި، ސަރަހައްދީ ހަމަނުޖެހުންތަކުގެ ސަބަބުން މިސްރުގެ އިގްތިސާދަށް ކުރިމަތިވަމުންދާ ލޮޅުންތަކުން ސަލާމަތްވުމަށް އެ ގައުމުގެ ސަރުކާރުން އެޅި ކުއްލި ފިޔަވަޅުތަކެކެވެ.