ލ. ގަމުގައި ޤާއިމްކުރާ ރިހެބިލިޓޭޝަން ސެންޓަރުގެ އަމަލީ މަސައްކަތް ފަށައިފިއެވެ.
މިކަމާ ގުޅޭގޮތުން ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ބުނީ، މިވަގުތު ކުރިއަށްދަނީ އިމާރާތުގެ ފައުންޑޭޝަން އެޅުމަށްޓަކައި ބިންކޮނުމުގެ މަސައްކަތްކަމަށެވެ. މިއީ ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން ކުރިއަށްގެންދާ މަސައްކަތެކެވެ. މި މަސައްކަތް އިފްތިތާހުކޮށްފައިވަނީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހައްދުންމަތީގެ މީހުން ދިރިއުޅޭ ރަށްރަށަށް ކުރެއްވި ދަތުރުފުޅުގައި މިދިޔަ އަހަރުގެ އޮކްޓޯބަރުމަހުގެ 23 ވަނަ ދުވަހުއެވެ.
މި މަސައްކަތް އާރުޑީސީއާ ހަވާލުކޮށްފައިވަނީ މިދިޔަ އަހަރުގެ މާރިޗްމަހުގެ 30 ވަނަ ދުވަހުއެވެ.
މަސްތުވާތަކެތީގެ ފަރުވާ ދިނުމުގެ ކަންކަން އަމިއްލަ ފަރާތްތަކަށް ދެވޭގޮތަށް ހުއްދަ ދިނުމަށް ސަރުކާރުން ވަނީ ނިންމާފައެވެ. މިހާތަނަށް ތިން ތަނެއްގައި ރިހެބިލިޓޭޝަން ސެންޓަރުތައް ހިންގައެވެ. އެ ތިން ތަނަކީ މާލޭގެ އިތުރުން ހުޅުމާލޭ ހާފްވޭ ހައުސް އާއި، ކ.ހިންމަފުއްޓެވެ.
މަސްތުވާ ތަކެތީގެ މައްސަލައަކީ ރާއްޖޭގައި މިހާރު ޤައުމީ މައްސަލައެއްގެ ގޮތުގައި ފާހަގަކުރެވިފައިވާ މައްސަލައެކެވެ.
Advertisement
This content is created and paid for by advertisers and does not involve Voice Journalists
