ކުޑަހުވަދޫގައި ދިރިއުޅޭ ބިދޭސީންނަށް ހާއްސަކޮށް ބޮޑު ދަރުހަކާއި ރޯދަ ވީއްލުމެއް ބާއްވައިފި
ދ.ކުޑަހުވަދޫގައި ދިރިއުޅެމުންދާ ބިދޭސީންނަށް ހާއްސަކޮށް ދީނީ ބޮޑު ދަރުހަކާއި، ރޯދަ ވީއްލުމެއް ކުރިއަށް ގެންގޮސްފިއެވެ.
މި ހަރަކާތްތަކާ ގުޅޭގޮތުން ވޮއިސްއަށް މައުލޫމާތު ހިއްސާކުރަމުން ކުޑަހުވަދޫ ޔުނައިޓެޑް އިސްލާމިކް ސޮސައިޓީގެ ރައީސް އިސްމާއީލް އާދިލް ވިދާޅުވީ، މި ހަރަކާތްތައް ކުރިއަށް ގެންގޮސްފައިވަނީ އިއްޔެކަމަށެވެ. ކުޑަހުވަދޫ ކައުންސިލާ އަދި ސަލަފްގެ އެހީތެރިކަމާއެކު ކްރިއަށްގެންދިޔަ މި ޕްރޮގްރާމުގެ ތެރެއިން ދަރުސް ކުރިއަށްގެންގޮސްފައިވަނީ ހަވީރުއެވެ.
ކުދަހުވަދޫއަކީ އެކިއެކި މަސަކަތްތައް ކުރުމުގައި ގިނަ އަދަދެއްގެ ބިދޭސީން ދިރިއުޅެމުންދާ ރަށެކެވެ.
ދަރުހަށްފަހު އެދުވަހު ބޭއްވި ރޯދަ ވީއްލުން.. ފޮޓޯ: ޔުނައިޓެޑް އިސްލާމިކް ސޮސައިޓީ
މިގޮތުން އެ ރަށުގެ އާބާދީގެ 8 އިންސައްތަ އަކީ ބިދޭސީންކަމަށް ނުރަސްމީ ހިސާބުތަކުން ދައްކައެވެ. ޔުނައިޓެޑް އިސްލާމިކް ސޮސައިޓީގެ ރައީސް ވިދާޅުވީ، މިފަދަ ހަރަކާތެއް ކުރިއަށް ގެންދިއުމުގެ މައިގަނޑު މަގްސަދަކީ ރަށުގައި އުޅެމުންދާ ބިދޭސީންގެ އަހްލާގާއި ސްލޫކު ރަނގަޅުކޮށް މުޖުތަމައުގައި އެމީހުންގެ ފަރާތުން ރީތި ސިފަތަކެއް ފެންނަ ބައެއްކަމުގައި ހެދުންކަމަށެވެ.
ބިދޭސީންނަށް ހާއްސަކޮށްގެން ބޭއްވި މި ބޮޑު ދަރުސްދެއްވީ ބަންގްލަދޭޝްއަށް ނިސްބަތްވާ ދީނީ އިލްމުވެރިއެކެވެ.
ކުޑަހުވަދޫގައި ބިދޭސީންނަށް ހާއްސަކޮށް ބޭއްވި ދަރުހުގެ ތެރެއިން... ފޮޓޯ: ޔުނައިޓެޑް އިސްލާމިކް
ދަރުސް އަޑުއެހުމަށް 450 ހަށްވުރެ ގިނަ ބިދޭސީން ހާޒިރުވިއެވެ.
ދަރުހަށްފަހު ބޭއްވި ރޯދަ ވީއްލުމުގެ ކަންކަން އިންތިޒާމު ކުރުމުގައި ރަށުގައި ދިރިއުޅެމުންދާ ބިދޭސީންނާއި ރަށުެގ އާއްމު ފަރާތްތަކުގެ ބައިވެރިވުން ލިބުނުއިރު މި ޕްރޮގްރާމް ކުރިއަށްދިޔައީ ވަރަށް ކާމިޔާބުކޮށްކަމަށް ޔުނައިޓެޑް އިސްލާމިކް ސޮސައިޓީން ވަނީ ފާހަގަކޮށްފައެވެ.
ޔުނައިޓެޑް އިސްލާމިކް ސޮސައިޓީ" (ޔޫ.އައި.އެސް) އަކީ ކުޑަހުވަދޫގެ އިތުރުން އަތޮޅު ފެންވަރުގައިވެސް ދީނީގޮތުން ރައްޔިތުން ހޭލުންތެރިކުރުވުމަށް ގިނަ ޕްރޮގްރާމްތައް ހިންގަމުން އަންނަ ޖަމިއްޔާއެކެވެ. އެ ޖަމިއްޔާގެ ދީލަތި އެހީތެރިކަމާއެކު މިފަހަކުން ވަނީ ދ. އަތޮޅު ތައުލީމީ މަރުކަޒުގައި މަލްޓިމީޑިއާ ސްޓޫޑިއޯއެއްވެސް ހުޅުވާފައެވެ. މި ސްޓޫޑިއޯ ތަރައްޤީކޮށްފައިވަނީ ޒަމާނީ އާލާތްތައް ބޭނުންކޮށްގެންނެވެ. އެގޮތުން މި ސްޓޫޑިއޯގައި ކެމެރާ، ލައިޓިންގއަށް ބޭނުންކުރާ އާލާތްތަކާއި، ރެކޯޑިން އަދި އިތުރުން ލައިވް ސްޓްރީމް ކުރުމަށް ބޭނުންވާ އާލާތްތައް ހިމެނޭކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
