ހުޅުމާލެ ދެކުނު ދާއިރާގެ އެމްޑީޕީގެ ކެންޑިޑޭޓަށް ރައީސް ޑރ. މުހައްމަދު މުޢިއްޒު ތާއީދު ކުރައްވާ ކަމަށް އޭނާ ދައްކަވާ ވާހަކަތައް ރައީސް މިއަދު ދޮގު ކުރައްވައިފި އެވެ.
ރައީސް އެކަން ދޮގުކުރެއްވީ ހުޅުމާލެ ދެކުނު ދާއިރާގައި ދޮރުން ދޮރަށް ހިންގެވުމުގެ ހަރަކާތް ކުރިއަށް ގެންދެވުމަށް ފަހު ނޫސްވެރީންނާއި ވާހަކަ ދައްކަވަމުންނެވެ. ރައީސް ވިދާޅުވީ އެ ދާއިރާގެ ގެތަކަށް ޒިޔާރަތް އެމްޑީޕީގެ ކެންޑިޑޭޓް ދޮގު ވާހަކަތަކެއް ދައްކަމުންދާ ކަމަށެވެ. އެގޮތުން ރައީސްގެ ތާއީދު އޮތީ އޭނާއަށް ކަމަށް ބުނަމުންދާ ކަމަށެވެ.
ހުޅުމާލެ ދެކުނު ދާއިރާއަށް އެމްޑީޕީން ކުރިމަތިލަނީ އަހްމަދު ޣާލިބު އެވެ. އޭނާ އަކީ ރައީސްގެ އާއިލީ މީހެކެވެ. އަދި ކުރީން ރައީސްގެ އަރިހުގައި މަސައްކަތްކުރި މީހެކެވެ. ނަަމަވެސް ފަހުން އެމްޑީޕީއާ ގުޅުނީ އެވެ.
ރައީސް ވިދާޅުވީ އެމަނިކުފާނުގެ ތާއީދު އޮތީ ޕީއެންސީ ކެންޑިޑޭޓުންނަށް އެކަނި ކަމަށެވެ.
"ކުރިއަށް އޮތް ކައުންސިލް އިންތިޚާބުގައި އަޅުގަނޑު ތާޢީދުކުރާ ކެންޑިޑޭޓުން ތިބޭނީ ޕީއެންސީ ޓިކެޓްގައި. ޚާއްސަކޮށް މި ދާއިރާގައި [ހުޅުމާލެ ދެކުނު ދާއިރާ] އަށް ނިކުމެ ހުރި އެމްޑީޕީ ކެންޑިޑޭޓަށް އަޅުގަނޑު ތާޢީދު ކުރާ ކަމަށް. އެއީ ކަނޑައެޅިގެން ދޮގެއް އިނގޭތޯ. އަޅުގަނޑުގެ ތާޢީދު އޮންނާނީ އަޅުގަނޑުމެންގެ ކެންޑިޑޭޓަށް އެކަނި. ޕީއެންސީ ކެންޑިޑޭޓަށް އެކަނި," ރައީސް ވިދާޅުވި އެވެ.
ރައީސް މިއަދުގެ ހަރަކާތުގައި: ރައީސްގެ އަރިހުގައި މޭޔަރު ކެންޑިޑޭޓް މޫސާ ޖަލީލް އަދި ހުޅުމާލެ ދެކުނު ދާއިރާގެ ކެންޑިޑޭޓް އުބޭ
ހުޅުމާލެ ދެކުނު ދާއިރާއަށް ތިން ކެންޑިޑޭޓަކު ވާދަކުރެ އެވެ. އެ ދާއިރާއަށް ޕީއެންސީގެ ޓިކެޓްގައި ވާދަކުރަނީ އަޙްމަދު ޢުބައިދު (އުބޭ) އެވެ. އަމިއްލަ ގޮތުން ނޮޅިވަރަމް ދާއިރާގެ ކުރީގެ މެންބަރު މުޙައްމަދު ނަޝީދު (މޮސްޓާ) ވާދަކުރެ އެވެ. ދެން ވާދަކުރަނީ އެމްޑީޕީގެ ޓިކެޓްގައި އަހްމަދު ޣާލިބް އެވެ.
ރައީސް ވިދާޅުވީ އެމަނިކުފާނަކީ ޕާޓީގެ ނިޒާމު ގަބޫލުކުރާ ބޭފުޅެއް ކަމަށެވެ. އެހެން ކަމުން އެހެން އެއްވެސް ޕާޓީއެއްގެ ކެންޑިޑޭޓަކަށް ތާއީދު ނުކުރައްވާ ކަމަށް ވިދާޅުވި އެވެ.
"އަޅުގަނޑުގެ ތާއީދު އޮންނާނީ އަޅުގަނޑުމެންގެ ކެންޑިޑޭޓަށް އެކަނި. ޕީއެންސީ ކެންޑިޑޭޓަށް އެކަނި. މިނިވަންކޮށް ހުންނަ ކެންޑިޑޭޓަކަށްވިޔަސް އެމްޑީޕީ ޓިކެޓްގައި ހުރި ބޭފުޅަކަށް ވިޔަސް އަދި އެއްވެސް އެހެން ބޭފުޅެއްގެ ޕާޓީއެއްގެ ޓިކެޓްގައި ހުރި ކެންޑިޑޭޓަކަށް އަޅުގަނޑުގެ ތާއީދެއް ނޯންނާނެ," ރައީސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
