ފްލައިޓް ކެންސަލްވެ 50 އުމްރާވެރީން ރާއްޖެ ނާދެވި އެބަތިބި ކަމަށާ އެ މީހުން ގެނެވޭނެ ގޮތްތަކެއް ހަމަޖައްސަމުންދާ ކަމަށް ސަރުކާރުން މިއަދު ބުނެފި އެވެ.
ސަރުކާރުން އެކަން ހާމަކުރީ މެދުއިރުމަތީގައި ފެށިފައިވާ ހަނގުރާމައާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެކުލަވާލެއްވި ވަޒީރުންގެ ހާއްސަ ކޮމިޓީން މިއަދު ބޭއްވި ނޫސްވެރީންގެ ބައްދަލްވުމުގައި އިސްލާމިކް މިނިސްޓަރު ޑރ. މުޙައްމަދު ޝަހީމް އެވެ.
މިނިސްޓަރު ވިދާޅުވީ ހުރިހާ އުމްރާވެރީންގެ ވެސް ހާލު ރަނގަޅު ކަމަށެވެ. އަދި ސައުދީގައި އެ އުމްރާވެރީންނަށް ދަތިކަމެއް ނެތް ކަމަށެވެ. ނަމަވެސް ސައުދީން ރާއްޖެ އަންނަ ދަތިވެފައިވާ 50 އުމްރާވެރިން އެބަ ތިބި ކަމަށާ އެކަން ސަރުކާރުގެ ސަމާލު ކަމަށް އައިސްފައިވާ ކަމަށެވެ.
މިނިސްޓަރު ވިދާޅުވީ އެ އުމްރާވެރީން ރާއްޖެ ގެނައުމާއި ގުޅޭގޮތުން މޯލްޑިވްސް ހައްޖު ކޯޕަރޭޝަނާއި ގުޅިގެން އިންތިޒާމުތަކެއް ހަމަޖައްސަމުން ގެންދާ ކަމަށެވެ. އަދި އެ އިންތިޒާމުތައް ހަމަޖެހޭނެ ކަމުގެ ޔަގީންކަން އެބަ އޮތް ކަމުގައި ވިދާޅުވި އެެވެ.
މީގެ އިތުރުން މިނިސްޓަރު ވަނީ ކުރިއަށް އޮތް ހައްޖުގެ އަޅުކަމަށްދާ ދިވެހީންނަށް އެއްވެސް ދައްޗެއް ކުރިމަތިވާނެ ކަމަށް ނުބެލެވޭ ކަމަށް ވެސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
