ރާއްޖޭގައި ބޭނުންކުރާ އިލެކްޓްރިކް އުޅަނދުތަކުގައި ފެހިކުލައިގެ ނަމްބަރ ޕްލެޓް ބޭނުންކުރަން ތައްޔާރުވެއްޖެއެވެ.
ޓްރާންސްޕޯޓް މިނިސްޓަރު މުހައްމަދު އަމީން އެކްސްގައި ކުރެއްވި ޕޯސްޓްގައި ވަނީ އިލެކްޓްރިކް ވެހިކަލްތަކުގައި ބޭނުންކުރާނެ ނަމްބޯޑުގެ ނަމޫނާއެއް ދައްކާލާފައެވެ. ޓްރާންސްޕޯޓް މިނިސްޓްރީން ނިންމާފައިވަނީ ޓެކްސީގެ ގޮތުގައި ދުއްވާ ވެހިކަލްތަކުގެ އިތުރުން، ޕްރައިވެޓް ވެހިކަލްތަކުގެ ގޮތުގައި ބޭނުންކުރާ އިލެކްޓްރިކް ވެހިކަލްތަކުގައިވެސް ފެހިކުލައިގެ ނަމްބަރ ޕްލެޓް ބޭނުންކުރުމަށް ނިންމާފައެވެ.
މިއީ ހަތް ވަނަ އިސްލާހްގެ ދަށުން ގެނެވުނު އާ ބަދަލެއްކަމަށް މިނިސްޓަރު އަމީން ވަނީ ވިދާޅުވެފައެވެ.
އިލެކްޓްރިކް ވެހިކަލްތަކުގެ ނަމްބަރު ޕްލެޓަށް ބަދަލު ގެނަުއުމަށް ތައްޔާރުވަމުންދާއިރު، ސަރުކާރުން ވަނީ މާލެ ސަރަހައްދަށް ތިމާވެއްޓާ ރައްޓެހި ވެހިކަލް ބޭނުންކޮށްގެން ތެކްސީގެ ހިދުމަތް ފެށުމަށް ނިންމާފައެވެ. އެގޮތުން ސަރުކާރުގެ ޓެކްސީ ލައިނެއްގެ ހިދުމަތް ކުރިއަށް އޮތް ފިތުރު އީދު ދުވަހު ފަށަން ތައްޔާރުވަމުންދާކަމަށް މިނިސްޓަރު އަމީން ވަނީ ވިދާޅުވެފައެވެ.
މިނިސްޓަރު ވިދާޅުވި ގޮތުގައި ޓެކްސީ ލައިންގެ ހިދުމަތް ފަށާއިރު ފުރަތަމަ ބުރުގައި 150 ކާރު ބޭނުންކުރާނޭ ކަމަށެވެ. ސަރުކާރުން ޓެކްސީ ލައިން ހިންގުމަށް ނިންމާފައިވަނީ ރައްޔިތުންނާ ސަރުކާރު ހިއްސާވާ ކުންފުނި، އެމްޓީސީސީ މެދުވެރިކޮށެވެ.
Advertisement
This content is created and paid for by advertisers and does not involve Voice Journalists
