އދ. ދިގުރަށުގައި ބިދޭސީން ދިރިއުޅޭ އެކޮމޮޑޭޝަން ބްލޮކެއްގައި ރޭ ހިނގި ނުރައްކާތެރި އަލިފާނުގެ ހާދިސާގައި، ތާށިވެފައި ތިބި މީހުން ސަލާމަތްކުރީ އެ ގޭގެ ފާރު ތަޅާލައިގެން ކަމަށް ފުލުހުން ހާމަކޮށްފިއެވެ.

މިބހާދިސާ އާ ގުޅިގެން ނެރުނު ބަޔާނުގައި ފުލުހުން ބުނިގޮތުގައި، ރޭ ދަންވަރު 01:57 އެހައިކަންހާއިރު މި ހާދިސާގެ ރިޕޯޓު ލިބުމާއެކު ފުލުހުން ވަނީ ވަގުތުން އެ ސަރަހައްދަށް ގޮސްފައެވެ. ފުލުހުން އެ ތަނަށް ދިޔައިރު ގޭގެ ބަދިގެ ތެރެއިން ވަރަށް ބޮޑަށް އަލިފާން އަރަމުންދިޔަ ކަމަށް ފުލުހުން ބުންޏެވެ.

މި ހާދިސާގައި ގޭތެރޭގައި ތާށިވެފައި ތިބި މީހުން ސަލާމަތްކުރުމަށްޓަކައި، ފުލުހުންނާއި އާންމުން ގުޅިގެން ކުރި މަސައްކަތުން ގޭގެ ބިތްދޮށު ފާރު ތަޅާލައިގެން ވަދެ، ހަބަރު ހުސްވެފައި ތިބި ހަތް މީހަކު ވަނީ ބޭރަށް ނެރެފައެވެ. މި ހަތް މީހުން ވަގުތުން ރަށު ސިއްހީ މަރުކަޒަށް ގެންދިޔައިރު، އޭގެ ތެރެއިން ފަސް މީހަކު ނިޔާވެފައިވާ ކަމަށް ސިއްހީ މަރުކަޒުން ކަށަވަރުކޮށްދީފައިވާ ކަމަށް ފުލުހުންގެ ބަޔާނުގައިވެއެވެ.

މީގެ އިތުރުން، ދުމުގެ އަސަރު ކުރުމުގެ ސަބަބުން ހާލު ސީރިއަސްވި ދެ މީހަކަށް އިތުރު ފަރުވާ ދިނުމަށްޓަކައި ރޭގެ ވަގުތެއްގައި ވަނީ މާލެ ގެނެސްފައެވެ. މި ހާދިސާގައި އަނިޔާވި އަދި ނިޔާވި ހުރިހާ އެންމެންނަކީ ވެސް ބަނގްލަދޭޝްގެ ރައްޔިތުންނެވެ. އަދި މި ހާދިސާއާ ގުޅިގެން ނަފްސާނީ ގޮތުން އަސަރުކުރި އިތުރު މީހަކަށް ސިއްހީ މަރުކަޒުން ފަރުވާ ދިނުމަށްފަހު މިހާރު ވަނީ ދޫކޮށްލާފައެވެ.

އާންމުންނާއި ފުލުހުން ކުރި ބުރަ މަސައްކަތުން އަލިފާންގަނޑު އެއްކޮށް ކޮންޓްރޯލް ކުރެވިފައިވަނީ ރޭ ދަންވަރު 02:30 އެހައިކަންހާއިރުއެވެ.

މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ފުލުހުން މިހާރު ވަނީ ހާއްސަ ތަހުގީގެއް ފަށާފައެވެ. އެގޮތުން ހާދިސާ ހިނގި ސަރަހައްދު ކޯޑަންކޮށް، މޭޖަރ ކްރައިމް އިންވެސްޓިގޭޝަންގެ ހާއްސަ ޓީމެއް މިއަދު ހެނދުނު ވަނީ ދިގުރަށަށް ގޮސް ހަރަކާތްތެރިވާން ފަށާފައެވެ.

ފުލުހުން ވަނީ މީހުން ސަލާމަތްކުރުމާއި އަލިފާން ނިއްވުމުގައި ދިގުރަށު ރައްޔިތުންގެ ފަރާތުން ލިބުނު ފުރިހަމަ އެއްބާރުލުމަށްޓަކައި ޝުކުރު އަދާކޮށްފައެވެ.