އިނގިރޭސި ޕްރިމިއާ ލީގްގައި ވެސްޓްހޭމް ޔުނައިޓެޑާ ދެކޮޅަށް ކުޅޭމެޗުން މެންޗެސްޓަރ ސިޓީ ބަލިވެއްޖެނަމަ ލީގް ހޯދުމުގެ ފުރުސަތު ސިޓީއަށް ގެއްލިގެންދާނޭކަމަށް އެޓީމްގެ ކޯޗް ޕެޕް ގާޑިއޯލާ ބުނެފިއެވެ.

މެޗްގެ ކުރިން ބޭއްވި ނޫސްވެރިންގެ ބައްދަލުވުމުގައި ގާޑިއޯލާ ބުނީ، މިހާރު ތާވަލް އޮތްގޮތުން ލީގް ޓައިޓަލް ލިބޭނޭކަމަށް އޭނާ ކަނޑައަޅާ މެޗަކީ ވެސްޓްހޭމް މެޗް ކަމަށާއި، އެމެޗުން ބަލިވެއްޖެނަމަ ލީގް ހޯދުމުގެ އުއްމީދު ގެއްލުނީކަމަށެވެ. 

ސިޓީ ވަނީ ޗެމްޕިއަންސް ލީގުގެ ގަދަ 16ގެ ފުރަތަމަ ލެގުގައި ބުދަ ދުވަހު ރެއާލް މެޑްރިޑް އަތުން 3-0 އިން ބަލިވެފައެވެ. އަދި ޕްރިމިއާ ލީގުގައި އެންމެ ފަހުން ކުޅުނު މެޗުގައި ރެލިގޭޝަނާ ދެކޮޅަށް ހަނގުރާމަ ކުރަމުން އަންނަ ނޮޓިންހަމް ފޮރެސްޓާ ދެކޮޅަށް އަމިއްލަ ދަނޑުގައި 2-2 އިން އެއްވަރުވެފައެވެ

ރެލިގޭޝަން ޒޯނުގައި އޮތް ވެސްޓް ހެމްއާ ދެކޮޅަށް ސިޓީ ކުޅެން ހަމަޖެހިފައިވާ މި މެޗާ ބެހޭގޮތުން ގާޑިއޯލާ ބުނީ، ލީގްގެ އެންމެފަހުން ކުޅޭ 10 މެޗަކީ އެންމެ މުހިންމު މެޗްތައް ކަމަށާއި، އެއީ ރެލިގޭޝަނާއި، މުބާރާތްތަކަށް ކުރާ އުއްމީދު ބިނާވެގެން ވަނީ އެ މެޗްތަކަށް ކަމަށެވެ.

ޕްރިމިއާ ލީގްގައި ސިޓީ އާއި ވެސްޓްހޭމް ބައްދަލުކުރާ މެޗް ފެށުމަށްހަމަޖެހިފައިވަނީ މިރޭ ދަންވަރު 01:00 ގައެވެ. ޕްރިމިއާ ލީގްގައި މިރޭ އާސެނަލް ނިކުންނާނީ، އެވަޓަން އާ ދެކޮޅަށެވެ. ލީގްގައި ސިޓީ ވެސްޓްހޭމް ޔުނައިޓެޑާ ދެކޮޅަށް ކުޅޭ މެޗުން ބަލިވެ، އާސެނަލް ކުޅޭމެޗުން އެޓީމަށް ތިން ޕޮއިންޓް ލިބިއްޖެނަމަ ތާވަލްގެ އެއްވަނާގައި އޮތް އާސެނަލަށް 10 ޕޮއިންޓްގެ ލީޑެއް ލިބޭނެއެވެ.