ކުރިއަށްއޮތް އަހަރަށް އެސްޓީއޯގެ ޑިރެކްޓަރުންގެ ބޯޑުގައި އާއްމު ހިއްސާދާރުންގެ ފަރާތުން ތަމްސީލްކުރާނޭ ޑިރެކްޓަރަކު އައްޔަނުކުރުމަށް ހުޅުވާލި ފުރުސަތުގައި ނަން ހުށަހެޅި ދެ ފަރާތެއްގެ ނަން އެސްޓީއޯއިން އާއްމުކޮށްފިއެވެ.

އާއްމު ހިއްސާދާރުންގެ ފަރާތުން އެސްޓީއޯގެ ބޯޑަށް ކުރިމަތިލުމަށް ހުސަހެޅި ދެ ބޭފުޅުންގެ ތެރޭގައި ހިމެނެނީ އެ ކުންފުނީގެ ބޯޑުގައި މިހާރުވެސް އާއްމު ހިއްސާދާރުންގެ ފަރާތުން ޑިރެކްޓަރެއްގެ ގޮތުގައި ހުންނެވި މުހައްމަދު އަހްސަން ސަލީމް އާއި ޢަބްދުﷲ ޔާސިރެވެ.

މީގެ ތެރެއިން ޔާސިރަކީ ވިޔަފާރިއާ އިންވެސްޓްމަންޓްގެ އިތުރުން ކެޕިޓަލް މާކެޓްގެ ދާއިރާގައިވެސް ހަރަކާތްތެރިވަމުން އަންނަ ތަޖުރިބާކާރު ބޭފުޅެކެވެ. 

އެސްޓީއޯގެ ޑިރެކްޓަރުންގެ ބޯޑުގައި އާންމު ހިއްސާދާރުންގެ ފަރާތުން ތަމްސީލުރާ ޑިރެކްޓަރުގެ މަޤާމަށް ކުރިމަތިލުމުގެ ފުރުސަތު އެކުންފުނިން ހުޅުވާލާފައިވަނީ މިއަހަރުގެ ޖެނުއަރީމަހުގެ ތެރޭގައެވެ. 

ސަރުކާރުގެ މައި ވިޔަފާރި ކުންފުނި، އެސްޓީއޯއަށް މިދިޔަ އަހަރު ލިބުނު ސާފު ފައިދާ އޭގެ ކުރީ އަހަރާ އަޅާބަލާއިރު %3 އިތުރުވެ، ސާފްފައިދާގެ ގޮތުގައި ވަނީ 762 މިލިއަން ރުފިޔާ ލިބިފައެވެ. މިދިޔަ އަހަރު އެސްޓީއޯއަށް ޖުމްލަ އާމްދަނީގެ ގޮތުގައި ވަނީ، 15.5 ބިލިއަން ރުފިޔާ ލިބިފައެވެ.