ދުބައި އިންޓަނޭޝަނަލް އެއާޕޯޓު ކައިރީގައި ހުރި ތެޔޮ ޓޭންކަކަށް ޑްރޯން ހަމަލާއެއް އެރުމާ ގުޅިގެން އެ އެއާޕޯޓުގެ ފްލައިޓް އޮޕަރޭޝަންތައް ވަގުތީ ގޮތުން ހުއްޓާލައި، އެމިރޭޓްސް އެއާލައިނުން ދުބައިއަށް ދަތުރުކުރާ އަދި ދުބައިން ފުރާ ހުރިހާ ފްލައިޓެއް ސަސްޕެންޑްކޮށްފިއެވެ.

ހޯމަ ދުވަހުގެ ފަތިހު ދުބައި އެއާޕޯޓު ކައިރީގައި ހުރި ތެޔޮ ޓޭންކަކަށް ޑްރޯން ހަމަލާއެއް އެރުމުން އަލިފާން ރޯވިކަން ދުބައި މީޑިއާ އޮފީހުން ވަނީ ކަށަވަރުކޮށްދީފައެވެ. އެ އޮފީހުން ބުނީ ސިވިލް ޑިފެންސް ޓީމުތަކުން އަލިފާންގަނޑު ކާމިޔާބުކަމާ އެކީ ކޮންޓްރޯލްކޮށްފައިވާ ކަމަށާއި، އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ. މި ހާދިސާ ހިނގީ ދުބައި ގަޑިން ފަތިހު 3 ޖެހިފަހުންނެވެ.

މި ހާދިސާއާ ގުޅިގެން ދުބައި ސިވިލް އެވިއޭޝަން އޮތޯރިޓީން ވަނީ ފަސިންޖަރުންނާއި މުވައްޒަފުންގެ ސަލާމަތީ ފިޔަވަޅެއްގެ ގޮތުން ދުބައި އިންޓަނޭޝަނަލް އެއާޕޯޓުގެ ފްލައިޓްތައް ވަގުތީ ގޮތުން ހުއްޓާލައިފައެވެ. ބައެއް ފްލައިޓްތައް އަލް މަކްތޫމް އިންޓަނޭޝަނަލް އެއާޕޯޓަށް ޑައިވާޓްކޮށްފައިވާ ކަމަށް ދުބައި އެއާޕޯޓްސް އިން ބުނެއެވެ.

މިކަމާގުޅިގެން އެމިރޭޓްސް އިން ވަނީ ދުބައިއަށް ދަތުރުކުރާ އަދި ދުބައިން ފުރާ ހުރިހާ ފްލައިޓެއް ވަގުތީ ގޮތުން ސަސްޕެންޑްކޮށް، ފަސިންޖަރުން އެއާޕޯޓަށް ނުދިއުމަށް އިލްތިމާސްކޮށްފައެވެ. އެ އެއާލައިނުން ބުނީ އިތުރު މަޢުލޫމާތު ލިބެން ފެށުމުން އަޕްޑޭޓް ދޭނެ ކަމަށާއި، ފަސިންޖަރުންނާއި ކްރޫގެ ސަލާމަތަކީ އެންމެ އިސް ކަންތައް ކަމަށެވެ.

ދުބައި އެއާޕޯޓު ކުއްލިއަކަށް ބަންދުކުރުމާ ގުޅިގެން، އިންޑިއާގެ ކޮޗީން އިން ދުބައިއަށް ދަތުރުކުރި އެމިރޭޓްސްގެ ފްލައިޓް އީކޭ533 ވަނީ 325 ފަސިންޖަރުންނާ އެކު އެނބުރި ކޮޗީންއަށް ޖައްސައިފައެވެ. ފަތިހު 4:30 ގައި ފުރި މި ފްލައިޓް ހެނދުނު 8:30 ގައި ރައްކާތެރިކަމާ އެކީ ކޮޗީންގައި ޖެއްސީ ދަތުރުގެ މެދުތެރެއިން އެނބުރި ދިއުމަށް އެންގުމުންނެވެ.

ފެބްރުއަރީ މަހުގެ ފަހުކޮޅު އެމެރިކާ އާއި އިސްރާއީލުން އީރާނަށް ދޭން ފެށި ހަމަލާތަކާ ގުޅިގެން މެދުއިރުމަތީގެ ހާލަތު ގޯސްވެފައިވާއިރު، އޮފިޝަލުން ބުނާ ގޮތުގައި މި ހަމަނުޖެހުން ފެށުނީއްސުރެ އީރާނުން ޔޫއޭއީއަށް 1،800 އަށް ވުރެ ގިނަ މިސައިލާއި ޑްރޯން ފޮނުވާލައިފައި ވެއެވެ. ފެބްރުއަރީ 28 ގައި ހަނގުރާމަ ފެށުނުތާ ގަޑިއިރުތަކެއް ތެރޭ، ދުބައި އެއާޕޯޓުގެ ޓާމިނަލް 3 ގެ ފުރާޅަށް ޑްރޯނެއް ވެއްޓި ހަތަރު މީހަކަށް އަނިޔާވެފައިވެއެވެ.

ހަނގުރާމައާ ގުޅިގެން ފެބްރުއަރީ 28 އިން މާޗް 31 ގެ ދެމެދަށް ބުކިން ހައްދާފައިވާ ކަސްޓަމަރުންނަށް އެމިރޭޓްސް އިން ވަނީ ފުރުޞަތުތަކެއް ހުޅުވާލައިފައެވެ. އެގޮތުން އެޕްރީލް 30 ގެ ކުރިން އެހެން ފްލައިޓަކަށް ބަދަލުކުރެވޭނެއެވެ. ސީދާ އެމިރޭޓްސް މެދުވެރިކޮށް ބުކް ކޮށްފައިވާ ނަމަ ރީފަންޑަށް ވެސް އެދެވޭނެއެވެ.