ކުރިއަށް އޮތް ލޯކަލް ކައުންސިލް އިންތިހާބުގައި މާފަންނު ހުޅަނގު ދާއިރާއަށް ވާދަކުރަން ނިންމި އިބްރާހީމް އަބޫބަކުރު ފަހަތަށް ޖެހި އެ ދާއިރާއަށް ކުރިމަަތިލާ ޕީއެންސީގެ ކެންޑިޑޭޓް މުހައްމަދު އަރީޝްއަށް ތާއީދު ކުރަން ނިންމައިފި އެވެ.
އިބްރާހިމް އަބޫބަކުރަކީ މިހާރުވެސް މާފަންނު ހުޅަނގު ދާއިރާގެ ކައުންސިލަރެވެ. އަރީޝް އަކީ މާފަންނު ހުޅަނގު އުތުރު ދާއިރާގެ ކައުންސިލަރެވެ. އޭނާ އަކީ މިހާރު މާލެ ސިޓީގެ ޑެޕިއުޓީ މޭޔަރެވެ. އިބްރާހިމް އަބޫބަކުރު ވަނީ ކައުންސިލް އިންތިހާބުގައި އަމިއްލަ ގޮތުން ވާދަ ކުރުމަށް ފޯމް ހުށައަޅާފަ އެވެ. އަރީޝް ވާދަ ކުރަނީ ޕީއެންސީގެ ފަރާތުންނެވެ.
ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު, މިއަދު މާފަންނު ހުޅަނގު ދާއިރާގެ ގެތަކަށް ދޮރުން ދޮރުން ހިންގެވުމަށް ކުރިއަށް ގެންދިޔަ ހަރަކާތުގައި އިބްރާހީމް އަބޫބަކުރު ވަނީ ބައިވެރިވެފަ އެވެ. އަދި ރައީސުލްޖުމްހޫރިއްޔާއާ ޕީއެންސީގެ ކެންޑިޑޭޓް އަރީޝްއާއެކު ނޫސްވެރީންނާއި ބައްދަލުކޮށް އިބްރާހީމް އަބޫބަކުރު ވަނީ އޭނާގެ ތާއީދު އަރީޝްއަށް އޮތް ކަމަށް ވިދާޅުވެފަ އެވެ.
އޭނާ ވިދާޅުވީ ޕީއެންސީ ކެންޑިޑޭޓަކު ހުރެ, އޭނާ އަމިއްލަ ގޮތުން ވާދަކުރުމަކީ ޕާޓީއަށް ގެއްލުން ވާނެ ކަމެއް ކަމަށެވެ. އެހެން ކަމުން އެ ފުރުސަތު ދޭން ބޭނުންނުވާ ކަމަށެވެ.
އޭނާގެ އެ ނިންމުމަށް ރައީސުލްޖުމްހޫރިއްޔާ ވަނީ ޝުކުރު އަދާކުރައްވާފަ އެވެ. ރައީސް ވިދާޅުވީ އިބްރާހިމް އަބޫބަކުރަކީ ވަރަށް ރަނގަޅަށް މަސައްކަތް ކުރަމުން އަންނަ ކައުންސިލަރެއް ކަމަށެވެ. އަދި އޭނާގެ ނިންމުން ފާހަގަ ކޮށް ޝުކުރު އަދާކުރެއްވި އެވެ.
Advertisement
This content is created and paid for by advertisers and does not involve Voice Journalists
