ރިޔާސީ އިންތިޚާބާއި މަޖިލިސް އިންތިޚާބު އެއްދުވަހެއްގައި ބޭއްވުމުން، ސަރުކާރު ޖަވާބުދާރީ ކުރުވުމުގެ ފުރުޞަތު ރައްޔިތުންނަށް ގެއްލޭނެ ކަމަށް އިދިކޮޅު މައި ޕާޓީ އެމްޑީޕީން ބުނެފިއެވެ. 

އެމްޑީޕީން މިއަދު ނެރުނު ނޫސް ބަޔާނެއްގައި ބުނީ، ޤާނޫނުއަސާސީ އިޞްލާޙުކުރުމާ ގުޅޭ ރެފެރެންޑަމް ލޯކަލް ކައުންސިލް އިންތިޚާބާ އެއްކޮށްލައިގެން ކުރިއަށް ގެންދަނީ ރައްޔިތުންނަށް އެކަށީގެންވާ މަޢުލޫމާތު ފޯރުކޮށްދިނުމެއް ނެތި ކަމަށެވެ.

އަދި މި އިސްލާހުގެ ސަބަބުން ފަސް އަހަރުގެ ދައުރުގައި ސަރުކާރު ޖަވާބުދާރީ ކުރުވުމުގެ ފުރުޞަތު ރައްޔިތުންނަށް ގެއްލޭނެ ކަމަށެވެ.

އެ ޕާޓީން ބުނީ މި އިޞްލާޙު މަޖިލީހުގެ ކޮމިޓީ މަރުޙަލާގައި ދިރާސާކުރީ އެންމެ ފަސް މިނެޓުން ކަމަށާއި، ތަޅުމުގައި ބަހުސްކުރީ އެންމެ ދެ ގަޑިއިރު ކަމަށެވެ.

އެ ބަޔާނުގައި އިތުރަށް ފާހަގަކޮށްފައިވާ ގޮތުގައި، އިލެކްޝަންސް ކޮމިޝަނުން އެމްޑީޕީއާ ބައްދަލުކޮށް، ޤާނޫނުގައި ލާޒިމުކުރާ މިންވަރަށް ރައްޔިތުން ހޭލުންތެރިކުރުވުމުގެ މަސައްކަތް ކުރެވިފައި ނުވާ ކަމަށް ބުނެފައިވެއެވެ. އަދި ދައުލަތުގެ މީޑިއާ، ޕަބްލިކް ސާވިސް މީޑިއާއިން "ނޫނެކޭ" ބުނާ ކެމްޕެއިނަށް ސަރުކާރުގެ ކެމްޕެއިނާ އެއް ހަމައެއްގައި ފުރުޞަތު ދީފައި ނުވާ ކަމަށް ވެސް އެ ޕާޓީން ބުންޏެވެ.

ސަރުކާރުން މި ބަދަލު ގެންނަން ދައްކާ ސަބަބަކީ ޚަރަދު ކުޑަވުމާއި "އިންތިޚާބުތަކުގެ ސަބަބުން ރައްޔިތުންގެ މެދުގައި ބައިބައިވުން އުފެދުން ކަމަށް ވީނަމަވެސް މި ޤާނޫނީ ބަދަލަކީ ވެރިކަމުގެ ބާރުތައް މަރުކަޒީކޮށް، ޤާނޫނުއަސާސީގައި ކަށަވަރުކޮށްދީފައިވާ ޗެކްސް އެންޑް ބެލެންސް ނެތިކޮށްލުމަށް ކުރާ މަސައްކަތެއް ކަމަށް އެ ޕާޓީން ސިފަކުރިއެވެ. މި ރެފެރެންޑަމް ބާއްވަން ހަމަޖެހިފައިވަނީ އެޕްރީލް 4 ވަނަ ދުވަހު ކައުންސިލް އިންތިޚާބާ އެކުއެވެ.