މެދުއިރުމަތީގައި ހިނގަމުންދާ ހަނގުރާމައާއި ގުޅިގެން، ހާލުގައި ޖެހިފައިވާ އާންމުންނަށް އެހީވުމަށް ޗައިނާއިން ނިންމައިފިއެވެ. މި އެހީ ފޮނުވުމަށް ހަމަޖެހިފައިވަނީ އީރާން، އުރުދުން، ލުބްނާން އަދި އިރާޤަށެވެ.
ޗައިނާގެ ހާރިޖީ ވުޒާރާގެ ސްޕޯކްސްޕާސަން ލިން ޖިއާން ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، މި އެހީގެ މައިގަނޑު ބޭނުމަކީ ހަނގުރާމައިގެ ސަބަބުން އާންމު ރައްޔިތުންނަށް ކުރިމަތިވެފައިވާ އިންސާނީ ތަކުލީފުތަކަށް ލުޔެއް ހޯދައިދިނުން ކަމަށެވެ. އަދި އެ ސަރަހައްދީ ހަމަޖެހުން ގާއިމުކުރުމަށް ބައިނަލްއަޤުވާމީ މުޖުތަމައުން މަސައްކަތް ކުރަންޖެހޭ ކަމަށްވެސް އޭނާ ފާހަގަ ކުރެއްވިއެވެ.
މި އެހީ އިއުލާންކޮށްފައިވަނީ އެމެރިކާ އާއި އިޒްރޭލުން އަސްކަރީ ހަމަލާތަައް އެ ސަރަހައްދުގައި ވަރުގަދަވެ، އާންމުންގެ ދިރިއުޅުމަށް ބޮޑެތި ހުރަސްތަކެއް ކުރިމަތިވެފައިވާ ދަނޑިވަޅެއްގައެވެ.
މީގެ އިތުރުން، އީރާނުގެ ސްކޫލަކަށް ދިން ހަމަލާއެއްގައި މަރުވި ކުދިންގެ އާއިލާތަކަށް 2 ލައްކަ ޑޮލަރު ދިނުމަށް ޗައިނާގެ ރެޑް ކްރޮސް އިން ވަނީ ނިންމާފައެވެ.
އެމެރިކާ އާއި އިޒްރޭލުން އީރާނަށް ވަރުގަދަ ހަމަލާތައް އަމާޒު ކުރަމުންދާއިރު، އީރާނުން ދަނީ އެމެރިކާގެ އަސްކަރީ މަރުކަޒުތަކަށް ހަމަލާދެމުންނެވެ.
Advertisement
This content is created and paid for by advertisers and does not involve Voice Journalists
