ރައްޔިތުން މަޖިލީހުގެ މެޖޯރިޓީ ލިބިގެންމެނުވީ ސަރުކާރެއް ނުހިންގޭނޭކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ބ.އަތޮޅު ތުޅާދޫއަށް ކުރެއްވި ޒިޔާރަތުގައި މިއަދު އެރަށުގައި ވާހަކަދައްކަވަމުން ރައީސް ނަޝީދު ވިދާޅުވީ، ވެރިކަމުގެ ނިޒާމަށް ގެންގަން ޖެހޭ ބަދަލުތައް އެބަހުރިކަމަށެވެ. އެގޮތުން މަޖިލީހުގެ އަޣުލަބިއްޔަތު ނެތި ސަރުކާރެއް ނުހިންގޭނޭކަމަށް ރައީސް ނަޝީދު ވިދާޅުވިއެވެ.

މި މޭރުމުން ވާހަކަދެއްކެވި ނަމަވެސް ރައީސް ނަޝީދު މިއަދުވެސް ވަނީ ދެ އިންތިހާބު އެއްދުވަހެއްގައި ބޭއްވުން ރަނގަޅު ނޫންކަމަށް ވިދާޅުވެ ވާހަކަދައްކަވާފައެވެ. ނަޝީދު ވިދާޅުވީ، ވެރިކަމުގެ ނިޒާމަށް ގެންނަ ބަދަލުތައް ވާންޖެހޭނީ އެންމެ ޕާޓީއެއް ބޭނުންވެގެން ގެންނަ ބަދަލަކަށްވުރެ ބޮޑަށް މުޅި ސިޔާސީ ޕާޓީތައް ބޭނުންވެގެން ގެންނަން ޖެހޭ ބަދަލަކަށް ކަމަށެވެ. އެގޮތުން ދެ އިންތިހާބު އެއްދުވަހެއްގައި ބޭއްވުމަށް ސަރުކާރުން ގެންގުޅެމުންދާ ވިސްނުން އެމަނިކްފާނަށް ފަހުމް ނުވާކަމަށް މިއަދު ވަނީ ވިދާޅުވެފައެވެ. 

ރައީސް ނަޝީދު ވިދާޅުވީ ދެ އިންތިހާބު އެއްދުވަހެއްގައި ބޭއްވުމުން މަޖިލީހުގެ މެމްބަރު އިންތިހާބު ވެގެން އަންނަނީ ރައީސުލްޖުމްހޫރިއްޔާއަށް ލިބޭ ތާއީދާ އެކުގައި ކަމަށާއި، އެހެން ވުމުގެ ސަބަބުން ރައްޔިތުންނާ، ރައްޔިތުންގެ މަޖިލީހުގެ މެންބަރަކާ ގުޅުމެއް ނެތްކަމަށް ނަޝީދު ވިދާޅުވިއެވެ.

މަޖިލީހުގެ މެޖޯރިޓީ ނެތި ސަރުކާރު ނުހުންގޭނޭކަމަށާއި އަދި ދެ އިންތިހާބު އެއްދުވަހެއްގައި ބޭއްވުމާ ދެކޮޅުކަަމަށް ރައީސް ނަޝިދު މިއަދު ވާހަކަފުޅު ދެއްކެވިނަމަވެސް މީގެ ކުރިން އެކްސްގައި ކުރެއްވި ޕޯސްޓެއްގައި އެމަނިކްފާނު ވިދާޅުވެފައިވަނީ، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުއެކީގައި ބޭއްވުމަކީ ރަނގަޅު ގޮތެއް ކަމުގައި ދެކެވަޑައިގަންނަވާކަށެވެ.