އަލިފާނުގެ ހާދިސާއާ ގުޅިގެން އިންތިހާބުގެ މަސައްކަތްތައް ނުހުއްޓޭނެ: ޒާހިދު
އިއްޒުއްދީން މަގުގައި ހުންނަ ގޯޑައުންގައި ހިނގާދިޔަ އަލިފާނުގެ ހާދިސާއާ ގުޅިގެން އިންތިހާބުގެ މަސައްކަތްތައް ހުއްޓުމަކަށް ނާންނާނޭކަމަށް އިލެކްޝަންސް ކޮމިޝަންގެ ރައީސް މުހައްމަދު ޒާހިދު ވިދާޅުވެއްޖެއެވެ.
މިރޭ އަލިފާނުގެ ހާދިސާ ހިނގި އެ ގޯޑައުން ހުންނަނީ އިންތިހާބާ ބެހޭ މަރުކަޒު ކައިރީގައެވެ. އަލިފާނުގެ ހާދިސާ އާ ގުޅިގެން މިރޭ އެތަން ވަނީ ހުސްކޮށްފައެވެ. މިކަމާ ގުޅޭގޮތުން ޕަބްލިކް ސާވިސް މީޑިއާ އާ ވާހަކަދައްކަވަމުން ޒާހިދު ވިދާޅުވީ، އަލިފާނުގެ ހާދިސާ އާ ގުޅިގެން ކުރިއަށްއޮތް އިންތިހާބުތަކުގެ މަސައްކަތްތަކަށް ބުރުލެއް ނާރައި އެ މަސައްކަތް ކުރިއަށްދާނޭކަމަށެވެ.
ޒާހިދު ވިދާޅުވީ، އަލިފާނުގެ ހާދިސާ ހިނގި ތަނުގެ ކައިރީހުރި އިންތިހާބާ ބެހޭ މަރުކަޒުގައި ހުރި ލިޔެކިޔުންތައް ރައްކާތެރިކަމާއެކު އެހެން ތަނަކަށް ބަދަލުކުރެވިފައިވާކަމަށެވެ. އެހެންކަމުން ކުރިންވެސް ކަނޑައަޅާފައިވާ ތާރީހަށް އިންތިހާބު ބޭއްވުމުގައި އެއްވެސް ކަހަލަ މައްސަލައެއް ކުރިމަތިވެފައި ނުވާކަމަށް އޭނާ ވިދާޅުވިއެވެ.
އަންނަ އޭޕްރިލްމަހުގެ 4 ވަނަ ދުވަހު 3 އިންތިހާބެއް ބޭއްވުމަށް ވަނީ ނިންމާފައެވެ. އެއީ ލޯކަލް ކައުންސިލް އިންތިހާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިހާބާއި، ރައްޔިތުން މަޖިލީހުގެ އިންތިހާބާއި، ރިޔާސީ އިންތިހާބުގެ ވޯޓު އެއްދުވަހެއްގައި ނަގަން ފެނޭތޯ ބެލުމަށް ނަގާ ރައްޔިތުންގެ ހިޔާލު ހޯދުމުގެ ވޯޓެވެ.
މި ތިން އިންތިހާބަށްވެސް އިލެކްޝަންސް ކޮމިޝަނުން އަންނަނީ އެންމެފަހުގެ ތައްޔާރީތައް ވަމުންނެވެ.
Advertisement
This content is created and paid for by advertisers and does not involve Voice Journalists
