މ.ކައިރުގޭގައި ހުންނަ "ޕްރައިމް ގޯޑައުން 1" ކެމިކަލް ގުދަނުގައި ރޭ ރޯވި އަލިފާންގަނޑު ނިއްވާލެވުނީ އަލިފާން ރޯވިތާ 7 ގަޑިއިރަށްވުރެ ގިނައިރު ވީފަހުން. ކަމަށް އެމްއެންޑީއެފުން ބުނެފިއެވެ.

އެންއެންޑީއެފުން ބުނީ، މި ހާދިސާގެ ރިޕޯޓް ރޭ 21:25 ހާއިރު އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުމާ އެކު، މާލޭ ފަޔަރ ސްޓޭޝަނުގެ ފަޔަރފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައިވާ ކަމަށެވެ.

މިގޮތުން، ރޯވި އަލިފާން 22:49 ހާއިރު ކޮންޓްރޯލްކޮށް، ރޭ ފަތިހު 04:58 ހާއިރު އަލިފާން އެއްކޮށް ނިއްވާލެވިފައިވާ ކަމަށެވެ.

އެމްއެންޑީއެފުން ބުނީ، މި ހާދިސާގައި އަލިފާން ނިއްވުމުގައި ވަރަށް ގިނަ ފަރާތްތަކެއްގެ އެހީތެރިކަން ލިބިފައިވާ ކަމަށެވެ. އެގޮތުން މޯލްޑިވްސް އެއަރޕޯޓްސް ކޮމްޕެނީ ލިމިޓެޑާއި، މޯޑްޑިވްސް ޕޮލިސް ސަރވިސްއާއި އަދި މާލެ ސިޓީ ކައުންސިލްއާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީއާއި ރެޑްކްރެސެންޓްގެ އިތުރުން އާންމުންގެ ވަރަށް ބޮޑު އެހީތެރިކަމެއް ލިބުނު ކަމަށް ބުންޏެވެ.

މި ގުދަނުގައި ހިނގި އަލިފާނުގެ ހާދިސާގައި އެ ސަރަހައްދުގައި ދުމުގެ އަސަރު ބޮޑުވުުމުން އެ ހިސާބުގެ ބައެއް ގޭބިސީތަކަށް ވަނީ ވަރަށް ބޮޑަށް އަސަރުކޮށްފައެވެ.

މި ހާދިސާއާ ގުޅިގެން ބައެއް ގޭބިސީތަކުގެ މީހުންނަށް ނޭޝަނަލް ޑިސާސްޓަރ މެނޭޖްމަންޓް ސެންޓަރުގެ ބެލުމުގެ ދަށުން އެހީތެރިކަން ވަނީ ފޯރުކޮށްދީފައެވެ. މި ހާދިސާގައި އެ ގުދަން ވަނީ ބޭނުން ނުކުރެވޭވަރަށް އެއްކޮށް އަނދާފައެވެ.