އިލެކްޝަން ކޮމިޝަނުގެ އަމަލުތައް ހުރިގޮތުން ކުރިއަށްއޮތް ލޯކަލް ކައުންސިލް އިންތިހާބާއި ޤައުމީ އިންތިހާބުގައި ރައްޔިތުންނަށް ގޮތް ނިންމަން އުނދަގޫވެފައިވާކަމަށް އިދިކޮޅު އެމްޑީޕީން ބުނެފިއެވެ.

ކުރިއަށްއޮތް ލޯކަލް ކައުންސިލް އިންތިހާބަށް އެމްޑީޕީގެ އޮތް ކަންބޮޑުވުން ފާޅުކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޕާޓީގެ ކެމްޕެއިން ތަރުޖަމާން ޢަބްދުالله ވަޙީދު ވަނީ އިލެކްޝަނުގެ އަމަލުތައް ހުރީ މިނިވަން އިންތިހާބަކަށް ފަހިވާ ބީދައިން ނޫންކަން ފާހަގަކޮށް އެކަމުގެ ކަންބޮޑުވުން ފާހަގަކޮށްފައެވެ. އެގޮތުން އިންތިހާބުގައި ރައްޔިތުންނަށް ވޯޓުލުމަށް އޮތް ފުރުސަތުތައް ހަނިކޮށްފައިވާ ކަމަސާއި، ރާއްޖެއިން ބޭރުގައި އުޅޭ ދިވެހިންނަށް މިފަހަރު އިންތިހާބުގައި ވޯޓުލުމުގެ ހައްޤު ގެއްލިފައިވާކަމަށް އޭނާ ވިދާޅުވިއެވެ.

އިލެކްޝަން ކޮމިޝަނުން ފެށުނީއްސުރެ މަސައްކަތްކުރަމުންދިޔައީ ވޯޓުލުމަށް އޮތް ފުރުސަތު ހަނިކުރަން ކަމަށާއި، ލޯކަލް ކައުންސިލް އިންތިހާބާއި، އަދި ޤައުމީ އިންތިހާބެއް އޮތްއިރު، މިކަމުގައި ވޯޓުލެވޭ އާބާދީގެ އެންމެންގެ ބައިވެރިވުމާއެކު ގޮތް ނިންމާނީ ކިހިނެތްތޯ އޭނާ ވަނީ ސުވާލު އުފައްދަވާފައެވެ.

އޭނާ ވިދާޅުވީ އިލެކްޝަނުން މަސައްކަތް ކުރަނީ ސަރުކާރުގެ ނުފޫޒުގައި ޖެހިގެންކަމަށާއި، ސަރުކާރުން އަންގާގޮތަށް އިލެކްޝަނުން ކަންކަން ކުރަން ހުއްޓާލަންޖެހޭ ކަމަށެވެ. އިންތިހާބާ ގުޅޭގޮތުން އެމްޑީޕީގެ ހުރި ކަންބޮޑުވުންތައް އިލެކްޝަން ކޮމިޝަނާ ހިއްސާކުރިކަން ފާހަގަކުރަމުން ވައްޑެ ވިދާޅުވީ، ރިފަރެންޑަމް ވޯޓެއް އޮތްއިރު އެ އިންތިހާބަށް އިލެކްޝަނަށް ތައްޔާރުވެވޭނޭކަމާމެދު ސުވާލު އުފެދޭކަމަށެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ހަނިމާދޫ ދާއިރާގެ މަޖިލީހުގެ މެމްބަރު ޢަބްދުލްޤަފޫރު މޫސާ ވަނީ ކުރިއަށްއޮތް އިންތިހާބަށް ކުރިމަތިލާއިރު ދައުލަތުގެ މުއައްސަސާތައް މިނިވަންކަމާއެކު މަސައްކަތްކުރަން ޖެހޭކަމަށް ވިދާޅުވެފައެވެ. މިހާރު މި ފެނިގެންދަނީ އެމަގުން ކަންކަން ހިނގަމުން ނުދާ މަންޒަރުކަމަށާއި، އުސޫލުން ބޭރުން ކަންކަން ކުރަމުންދާނަމަ އެ މުއައްސަސާއެއް ޤާނޫނުގެ ކުރިމައްޗަށް ގެންނާނޭކަމަށް ވިދާޅުވެ، ގަޕޯ ވަނީ މިނިވަން މުއައްސަސާތަކަށް އިންޒާރުދޭ މޭރުމަކުން ވާހަކަދައްކަވާފައެވެ.