ދުނިޔޭގެ ބާޒާރަށް ތެއޮ ސަޕްލައިކުރާ މައި މަގު، ހުރްމުޒް ކަނޑުއޮޅި ހުޅުވަން އެމެރިކާއިން އީރާނަށް 48 ގަޑިއިރުގެ މުހުލަތެއް ދީފިއެވެ.

އެމެރިކާގެ ރައީސް ޑޮނާލްޑް ޓްރަމްޕް ވަނީ، ކުރިއަށްއޮތް 48 ގަޑިއިރުގެ ތެރޭގައި ހުރްމުޒް ކަނޑުއޮޅި ހުޅުވަން އަންގައި އީރާނަށް ވަރުގަދަ އިންޒާރެއް ދެއްވާފައެވެ. ޓްރަމްޕް ވިދާޅުވީ، އިންޒާރާ އެއްގޮތަށް ކަނޑުއޮޅި ހުޅުވާނުލައިފިނަމަ، އީރާނުގެ ހަކަތަ އުފައްދާ މަރުކަޒުތައް ނައްތާލާނެކަމަށެވެ.

ޓްރަމްޕް މި ބީދައިން އިންޒާރު ދެއްވީ ދުނިޔޭގެ ތެލުގެ ވިޔަފާރީގެ މުހިންމު މަގަކަށްވާ ހޯރްމުޒް ކަނޑުއޮޅި ބަންދުކޮށްފައި އޮތް އޮތުން ނިމުމަކަށް ގެނައުމަށް ބާރުއެޅުމުގެ ގޮތުންނެވެ.

ޓްރަމްޕްގެ އަމިއްލަ ސޯޝަލް މީޑިއާ މެދުވެރިކޮށް ވިދާޅުވެފައިވަނީ، ކުރިއަށް އޮތް 48 ގަޑިއިރުގެ ތެރޭގައި އެ ކަނޑުއޮޅި އާންމު ދަތުރުފަތުރަށް ހުޅުވާނުލައިފިނަމަ، އީރާނުގެ އެކި ސަރަހައްދުތަކުގައި ހުރި 'ޕަވަރ ޕްލާންޓް' ތަކަށް ހަމަލާދީ އެ ތަންތަން ބިމާ ހަމަކޮށްލާނެ ކަމަށެވެ. މި ހަމަލާތައް ފަށާނީ އީރާނުގައި ހުރި އެންމެ ބޮޑު މަރުކަޒުން ކަމަށްވެސް ޓްރަމްޕް ފާހަގަކުރެއްވިއެވެ.

މި އިންޒާރާ ގުޅިގެން އީރާނުންވެސް ވަނީ ރައްދު ދީފައެވެ. އީރާނުގެ އަސްކަރިއްޔާއިން ބުނެފައިވަނީ، އެ ގައުމުގެ ހަކަތައާ ބެހޭ އިންފްރާސްޓްރަކްޗަރަށް އެއްވެސް ގެއްލުމެއް ދީފިނަމަ، ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކާއި އިޒްރޭލުގެ މުހިންމު ތަންތަނަށް ވަރުގަދަ ހަމަލާތަކެއް ދޭނެ ކަމަށެވެ. މިއާއެކު މެދުއިރުމަތީގެ މަސްރަހު ވަނީ ނުތަނަވަސްކަމެއްގެ ތެރެއަށް ވެއްޓިފައެވެ.

ހުރްމުޒް ކަނޑުއޮޅި ބަންދުވުމުގެ ސަބަބުން ދުނިޔޭގެ ބާޒާރުގައި ތެލުގެ އަގު ވަނީ އިންތިހާއަށް އުފުލިފައެވެ. ދުނިޔޭގައި ބޭނުންކުރާ ތެލުގެ ގާތްގަނޑަކަށް %40 ބާޒާރުތަކަށް ނެރެނީ މި ކަނޑުއޮޅިން ކަމަށްވާއިރު، މި މަގު ބަންދުވުމަކީ ދުނިޔޭގެ އިގްތިސާދަށް އޭގެ ނޭދެވޭ އަސަރު ވަރަށް ބޮޑަށް ކުރަމުންދާ ކަމެކެވެ.

މި ނުރައްކާތެރި ދަނޑިވަޅުގައި، ބައިނަލްއަގުވާމީ މުޖުތަމައުން ދަނީ ދެ ފަރާތުންވެސް އަމާން ދިނުމަށް ގޮވާލަމުންނެވެ. ނަމަވެސް ޓްރަމްޕްގެ މި އިންޒާރާއެކު، ކުރިއަށް އޮތް 48 ގަޑިއިރަކީ މުޅި ދުނިޔެ ސަމާލުވެގެން ތިބޭނެ ވަގުތުތަކެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.