ތެލުގެ ބޭނުން ކުޑަކުރަން ދުނިޔޭގެ ހަކަތައާއި ބެހޭ އެޖެންސީގެ ވެރިޔާ ގޮވާލައިފި
އިންޓަނޭޝަނަލް އެނާޖީ އެޖެންސީ (އައިއީއޭ) ގެ ވެރިޔާ ފާތިހް ބީރޯލް، ހޮރްމޫޒް ކަނޑުއޮޅި ބަންދުވެފައި އޮތުމުން ކުރިމަތިވެފައިވާ ހަކަތައިގެ ބޮޑު ކާރިސާއާ ގުޅިގެން، ތެލާއި ގޭހުގެ ބޭނުންކުރުން ވަގުތުން މަދުކުރުމަށް ސަރުކާރުތަކަށް ގޮވާލައިފިއެވެ.
ތުރުކީގެ ހުއްރިއެތު ނޫހަށް ދެއްވި އިންޓަވިއުއެއްގައި ބީރޯލް ވިދާޅުވީ މި ކާރިސާގެ ސަބަބުން ދުވާލެއްގެ މައްޗަށް 11 މިލިއަން ފީފާގެ ތެޔޮ އުފެއްދުން ހުއްޓިފައިވާ ކަމަށެވެ. މިއީ 1973 އާއި 1979 ގެ ތެލުގެ ދެ ކާރިސާގައި ޖުމްލަ ގެއްލުނު 10 މިލިއަން ފީފާއަށް ވުރެ ވެސް ބޮޑު އަދަދެކެވެ. ގޭހުގެ ދާއިރާއަށް ބެލިޔަސް ހާލަތު ހަމަ އެހާ ގޯހެވެ. ގަތަރާއި ޔޫއޭއީ އިން ބޭރުކުރާ ގޭސް ހުއްޓުމާ އެކު 140 ބިލިއަން ކިއުބިކް މީޓަރުގެ ގޭސް ސަޕްލައި މެދުކެނޑިފައިވާ ކަމަށް ބީރޯލް ވިދާޅުވިއެވެ. މިއީ ރަޝިޔާ-ޔޫކްރެއިން ހަނގުރާމައިގައި ގެއްލުނު މިންވަރަށް ވުރެ ގާތްގަނޑަކަށް ދެ ގުނަ ބޮޑު އަދަދެކެވެ.
މިހާރު ކުރިމަތިވެފައި މިވާ ކާރިސާއަކީ 1970 ގެ ދެ ތެލުގެ ކާރިސާ އާއި ރަޝިޔާ-ޔޫކްރެއިން ގޭސް ކާރިސާ އެއްކޮށްލީމާ ވެސް އެއަށް ވުރެ ބޮޑު ކާރިސާއެއް
ބީރޯލް ވިދާޅުވިއެވެ.
ބާޒާރުތަކާއި އަގުތައް އާންމު ހާލަތަށް ރުޖޫޢަވާނެ މައިގަނޑު ހައްލަކީ ހޮރްމޫޒް ކަނޑުއޮޅި އަލުން ހުޅުވުން ކަމަށާއި، ކަނޑުއޮޅި ގިނަ ދުވަހަށް ބަންދުވެއްޖެ ނަމަ ދުނިޔޭގެ އިގުތިސާދަށް ލިބޭ ގެއްލުން ހަލުވިކަމާ އެކު ބޮޑުވެގެންދާނެ ކަމަށް ވެސް އޭނާ ވިދާޅުވިއެވެ.
ބީރޯލް ވިދާޅުވީ މި ކާރިސާ ހަމައެކަނި ތެލާއި ގޭހަށް ލިމިޓް ނުވާ ކަމަށެވެ. ދުނިޔޭގެ ގަސްކާނާ (ފާޓިލައިޒަރު)ގެ ތިންބައިކުޅަ އެއްބައި ހޮރްމޫޒް ކަނޑުއޮޅިން ދަތުރުކުރާ ކަމަށާއި، މި ހާލަތު ދެމިގެންދާ ނަމަ ދަނޑުވެރިކަމުގެ ދާއިރާއަށް އަސަރުކޮށް ކާބޯތަކެތީގެ އަގުތައް މައްޗަށް ދިޔުމުގެ ފުރުސަތު އެބައޮތް ކަމަށެވެ. އޭގެ އިތުރުން ޕެޓްރޯކެމިކަލް އުފެއްދުންތަކުގެ ހަތަރުބައިކުޅަ އެއްބައި ވެސް އެ ކަނޑުއޮޅިން ދަތުރުކުރާ ކަމަށާއި، ސަލްފާ، ހީލިއަމް އަދި ބޭސްވެރިކަމުގެ ދާއިރާއަށް ކޮންމެހެން ބޭނުންވާ މާއްދާތައް ވެސް ހުއްޓިފައިވާ ކަމަށް ވިދާޅުވިއެވެ.
މި ހާލަތު ދިގުދެމިގެންދާ ނަމަ ހަކަތައިގެ އަގު ބޮޑުވެ، އިންފްލޭޝަން މައްޗަށް ގޮސް، ހަކަތަ އެތެރެކުރާ ގައުމުތަކުގެ ކަރަންޓް އެކައުންޓް ދަރަނި ބޮޑުވެ، އިގުތިސާދީ ކުރިއެރުން މަޑުޖެހި، ބައެއް ގައުމުތައް ދަރަނީގެ ނުރައްކާ ބޮޑު ހާލަތަކަށް ވެއްޓިދާނެ ކަމުގެ އިންޒާރު ބީރޯލް ދެއްވިއެވެ.
އައިއީއޭ އިން ސަރުކާރުތަކަށް ހުށަހަޅާ ފިޔަވަޅުތަކުގެ ތެރޭގައި ގޭގައި މަސައްކަތްކުރުން ފުޅާކުރުމާއި، ހައިވޭ ސްޕީޑް ލިމިޓް މަދުވެގެން 10 ކިލޯމީޓަރު ދަށްކުރުމާއި، ޕަބްލިކް ޓްރާންސްޕޯޓް އަގުހެޔޮ ކުރުމާއި، ކާރު ޝެއާ ކުރުން ޕްރޮމޯޓް ކުރުމާއި، ޕްރައިވެޓް ޖެޓްތައް ގްރައުންޑް ކުރުން ހިމެނެއެވެ.
Advertisement
This content is created and paid for by advertisers and does not involve Voice Journalists
