ހދ. ކުޅުދުއްފުށީގައި ޑީސަލް ބޭނުންނުކޮށް ހަމައެކަނި އިރުގެ ހަކަތައިން ފެން އުފެއްދުމަށް ޤާއިމުކުރި ނިޒާމުގެ އަމަލީ މަސައްކަތްތައް ނިމިއްޖެއެވެ.
އެމްޑަބްލިޔުއެސްސީން ބުނި ގޮތުން، މި މަޝްރޫޢަކީ މޫސުމަށް އަންނަ ބަދަލުތަކާއި ދުނިޔޭގެ މަޝްރަހަށް އަންނަ ބަދަލުތަކުގެ ސަބަބުން ކުރިމަތިވާ ގޮންޖެހުންތަކުގެ ތެރޭގައިވެސް، މެދުނުކެނޑި ފެނުގެ ޚިދުމަތް ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ސިޔާސަތުގެ ދަށުން ކުރިއަށްގެންދިޔަ މަޝްރޫޢެކެވެ.
މި ނިޒާމު ފަރުމާކޮށްފައިވަނީ ރާއްޖޭގެ ޤުދުރަތީ ވަސީލަތްތައް އެންމެ ފުރިހަމަ ގޮތުގައި ބޭނުންކުރެވޭނެ އުސޫލުންނެވެ.
އެ ކުންފުނިން 2025 ވަނަ އަހަރު އަމަލީ މަސައްކަތް ފެށި މި މަޝްރޫޢުގެ ދަށުން، ކުޅުދުއްފުށީގައި މިހާރު ކުރިއަށްދަނީ ނިޒާމު އިފްތިތާހުކުރުމުގެ ކުރިން ފުރިހަމަކުރަންޖެހޭ ޓެސްޓިންގ މަރުހަލާތަކެވެ. މި މަސައްކަތްތައް ނިމުމާއެކު، އަންނަ އޭޕްރީލް މަހުން ފެށިގެން އެ ރަށުގައި ޑީސަލް ބޭނުންނުކޮށް މުޅި ރަށަށް ބޭނުންވާ މިންވަރަށް ފެން އުފެއްދުމުގެ ޤާބިލުކަން ލިބިގެންދާނެއެވެ.
މި ނިޒާމު އޮޕަރޭޝަނަށް އައުމާއެކު، ރާއްޖޭގެ މީހުން ދިރިއުޅޭ ރަށްރަށުގައި ދެމެހެއްޓެނިވި ގޮތެއްގައި ފެނުގެ ޚިދުމަތް ދިނުމުގެ އައު ބާބެއް ފެށިގެންދާނެ ކަމަށް އެމްޑަބްލިޔުއެސްސީން ބުނެއެވެ. އަދި މިއީ ތެލަށް ކުރާ ހޭދަ ކުޑަކޮށް، އިއާދަކުރަނިވި ހަކަތައަށް ބަދަލުވުމަށް ރާއްޖެއިން ކުރާ ދަތުރުގައި ލިބުނު ފާހަގަކޮށްލެވޭ ކާމިޔާބީއެއް ކަމަށްވެސް ބުންޏެވެ
މި މަޝްރޫޢު ނިމުމާ ގުޅިގެން، މި މަސައްކަތުގައި އަމަލީގޮތުން ބައިވެރިވި ހުރިހާ ފަރާތްތަކަށާއި އެހީތެރިކަން ފޯރުކޮށްދިން މުއައްސަސާތަކަށް އެކުންފުނިން ވަނީ ޝުކުރު އަދާކޮށްފައެވެ.
Advertisement
This content is created and paid for by advertisers and does not involve Voice Journalists
